- A ciclista pontevedresa Lorena Patiño venceu con autoridade no circuíto de Valladolid, onde os dous conxuntos cadetes da Selección de Galicia remataron segundos.
A xeración de ouro cadete do ciclismo galego sumou un segundo título no Campionato de España de Escolares celebrado en Valladolid.
Dous días despois de que María Filgueiras conquistara a proba de contra o reloxo individual en estrada, a pontevedresa Lorena Patiño impúxose con autoridade na proba de Cross Country Olímpico (XCO) e ademais recolleu xunto as súas compañeiras da Selección de Galicia a medalla de prata por equipos, mesmo premio que obtivo o conxunto masculino.
Co arranque do mes de xullo, entre o venres e o sábado, 34 ciclistas infantís e cadetes defenderon as cores da Selección de Galicia en terras pucelanas. As competición de Cross Country Olímpico (XCO) disputáronse no circuíto do Cerro de las Contiendas, onde Lorena Patiño partía como unha das favorias tras o seu triunfo o mes pasado na Copa de España de Baza. A biker de Pontevedra Lorena Patiño marcou un forte ritmo dende o inicio que intentaron seguir a catalana Kyra Gali e a balear Neus Capella, pero as diferenzas foron ampliándose a medida que pasaban as voltas, segundo informa a Federación Galega de Ciclismo.
Sen oposición, a ciclista galega Lorena Patiño chegou á meta en solitario cun tempo de 55:24, con 2:18 de vantaxe sobre Kyra Gali e 2:41 respecto á tamén catalá Mariona Ratera. “Non mo esperaba, estou moi contenta e ilusionada. Mantívenme terceira ata a subida do rock garden e aí xa me fun. Había rivais moi duras, a segunda clasificada era de segundo ano”, comentou a corredora do Club Ciclista Compostelano, que participou por primeira vez como cadete no Campionato de España de Escolares.
Dobre prata por equipos para a Selección de Galicia
Outras dúas ciclistas representantes de Galicia remataron esta competición entre as dez primeiras clasificadas. Aroa Otero logrou a sexta praza e Marta Estévez, a novena. Estos resultados que xunto ao xa citado de Patiño outorgaron ao cuarteto da Selección de Galicia, que completou Iris Fernández (25ª), a segunda posición na clasificación por equipos deste Campionato de España Escolar cadete, quedando a so catro puntos da vencedora Catalunya. O podio completouno Andalucía.
O mesmo resultado colectivo asinou o conxunto cadete masculino. O combinado dirixido polo seleccionador Alberto del Río obtivo a segunda praza, a sete puntos de Catalunya, e superando por 20 puntos a Euskadi. A nivel individual, Alejandro García cruzou a meta na sexta posición e ás portas do top-10 concluíron Tomás Pombo, undécimo, e Mauro Vega, décimo terceiro. Denis González, o cuarto compoñente da Selección na liña de chegada, terminou 28º.
Nesta xornada o Cerro de las Contiendas tamén acolleu as carreiras infantís. Na masculina, Galicia acadou o que se coñece como unha medalla de chocolate con Martín Rodríguez, cuarto clasificado a 30″ do bronce. Ao cuarteto da Federación Ciclismo Galego correspondeulle o sétimo posto, con Xián Rodríguez 20º, Lucas Lozano 39º e Marcos Rodríguez 41º.
Unha posición máis arriba, sextas, acabaron as rapazas infantís. Alba Gregores, décimo oitava, encabezou os resultados individuais das galegas, con Xiana Seijo 23ª, Lara Pita 29ª e Ainoa Posada 44ª.
Menos sorte na xincana
A categoría infantil de estrada tamén competiu o sábado. As probas de xincana tiveron lugar no aparcamento do Estadio José Zorrilla. Loitando contra o reloxo e demostrando habilidade sobre a bicicleta, a Selección Galega tivo como representante máis destacado a Maxime Regozo, sexto entre os rapaces. O conxunto masculino, sétimo na táboa, contou ademais con Anxo Delgado (17º), Unai Fernández (35º) e Pedro Liaño (60º).
Pola súa banda, as infantís fixeron undécimas por equipos, con Carmen Cabot (27ª), Alejandra Neira (30ª), Irene Signo (35ª) e Ivet Ivanova (54ª).
Máis información e clasificacións XCO e Xincana, nesta ligazón
