O BTT galego viviu esta semana un día para o recordo. A ciclista Lorena Patiño, unha das grandes promesas desta disciplina en Galicia, debutou coas cores da Selección Española. A dobre campioa estatal cadete de Cross Country demostrou o seu potencial no European Youth Olympic Festival 2023 (Festival Olímpico da Xuventude Europea) que se celebra na cidade eslovena de Maribor. A corredora marinense do XSM logrou unha meritoria sétima posición na carreira de XCO.
O Bike Park Pohorje, o máis grande de Eslovenia, foi o lugar sobre o que se deseñou o circuíto para as carreiras da especialidade olímpica. Nun trazado técnico e esixente, con algo de barro nalgúns treitos, sobre o que marcaron a pauta en todo o momento dúas corredoras: a suíza Anja Grossmann e a francesa Lise Revol.
Por detrás, conformouse un grupo que pelexou polos postos de honra. Entre as súas compoñentes estivo Lorena Patiño, asinando unha actuación de gran nivel e moita garra de principio a fin en representación da RFEC.
A ciclista de Marín finalizou a a 7’04” da gañadora Anja Grossmann tras bater nos últimos metros á representante italiana Sofia Guichardaz.
Con este top-10 continental, Patiño pecha unha extraordinaria temporada de XCO na que se mantivo invicta ata a súa primeira experiencia co combinado estatal, tal e como recordan desde a Federación Ciclismo Galego.
