As xogadoras do Dépor ABANCA aínda non coñecen a derrota nesta tempada na Reto Iberdrola. O equipo dirixido por Miguel Llorente semella ter a fórmula para puntuar xornada a xornada, cun xogo particular. “Facemos algo diferente ao que fai o resto”, asegura o preparador.
O conxunto está a traballar moi ben e non se viu afectado polo parón na competición na pasada fin de semana. “Os paróns sempre son unha arma de dobre fío porque non sabes como imos volver. Ao final reláxaste porque para iso son os paróns e logo tes que volver á práctica. Volvimos ben. Ao final levamos anos adestrando e sabemos como activar os días que son importantes estar activas. Estamos moi ben, desfrutando, contentas e practicando moi ben”, declarou Llorente.
O Dépor fala outro idioma
O xogo do Dépor ABANCA caracterízase por saír do molde do fútbol. As branquiazuis xa non xogan coas posicións habituais, aínda que se guían por elas, e adaptan o seu estilo ás necesidades de cada partido.
Llorente: “O 90% dos equipos falan alemán, por exemplo, e nós falamos sueco”
O míster explícao cunha metáfora: “O 90% dos equipos falan alemán, por exemplo, e nós falamos sueco, nin mellor nin peor, pero facemos algo diferente. Xa dixen no seu momento, e non quero que soe a soberbia, que nós non miramos ao rival. Fixámonos en que nós falemos sueco da mellor maneira para que elas nos entendan o mínimo posible, e poidamos atopar a maneira de gañar. Miramos un pouco o rival, pero como sempre direi, centrámonos en falar moi ben o noso idioma, todas as semanas aprendemos unha letra e despois de tres semanas comezamos a combinalas para construír palabras”. Esas letras son ideas para xogar, ideas que van combinando e practicando nas sesións de traballo.
Llorente: “Para min non existen as posicións”
Llorente entende o fútbol “como un xogo de asociacións e interaccións. Para min non existen as posicións. Obviamente sirven de base porque elas traen unha formación en alemán anterior diferente, polo tanto esa liberade vén dada polas necesidades que elas entendan que ten a compañeira e o xogo”.
Para cumprir o obxectivo de marcar, “esas asociacións permiten dunha superioridade e que nin o rival saiba que vai pasar. Se imos cun idioma diferente é moi dificil que nos entenda e é máis difícil contrarrestarnos e é difícil sacar un resultado positivo. Que non haxa posicións, para nós é unha autoorganización que practicamos todos os días e para o rival é moi difícil de defender porque nin nós mesmas sabemos que vai pasar en cada acción. As posicións serían unha maneira de pechar as cousas que só nos perxudicaría”, apuntou o adestrador branquiazul.
De cara ao partido desta fin de semana ante o DUX Logroño, as coruñesas deberán prepararse para xogar nun campo de distancias curtas. “Se nós somos fieis ao que estamops aprendendo, no que cremos, co que estamos desfrutando, porque estamos desfrutando moito, o espazo é un factor limitante pero pode ser potenciador. Podemos asociar en curto e poderemos xogar máis rápido. A clave estará en sacar partido das circunstancias que nos atopemos e creo que pode ser un campo moi favorable para nós”, reflexiona Llorente.
Llorente: “Pode ser un campo moi favorable para nós”
Ibi será baixa
Para o duelo, Ibi será baixa. A xogadora súmase a Alba Merino no hospital branquiazul. “O resto están disponibles e poderemos ir a Logroño con todas”, apuntou o adestrador.
Preguntado por outra das súas pupilas, Ale Serrano, e polo seu impresionante gol na última xornada, Llorente recordou que “me pareceu unha barbaridade. Iso é o que esperamos ver todos os espectadores nos partidos”.
O adestrador explica o gol debido ao seu sistema de xogo: “Desde esa mínima orde que nos propoñemos pode aparecer a creatividade. Explicándolle un pouco ao inicio o que se esperaba dela, un falso 9 que recibe por dentro, ela entendeuno de marabilla, sentiuse moi libre, porque é unha xogadora moi creativa. Nin nos mellores soños pensei que podería marcar o que marca, pero iso é froito da liberdade que elas teñen e esa creatividade que levan innata”.
Llorente: “Nin nos mellores soños pensei que podería marcar o que marca”
A Reto non ten sorpresas para Llorente
Respecto ao igualado da competición da Reto Iberdrola nestas primeiras semanas, Miguel Llorente considera que a situación actual era o esperable. O Levante Las Planas marcha primeiro malia ter ascendido recentemente, “porque conta con xogadoras que competiron moitos anos en Reto”. Por outra banda, o filial do Barcelona só perdeu dous partidos polo de agora, “que é o normal”, e os equipos que descenderan da Primera Iberdrola mantéñense na zona alta.
“Non me sorprendeu moito. É un inicio apretado, pero como todas as carreiras, veremos a metade de carreira quen se vai descolgando ou quen se mantén firme e constante nas primeiras posicións”.
