Este martes o Dépor ABANCA de Miguel Llorente xoga un partido a vida ou morte en Riazor. As branquiazuis reciben ao Atlético de Madrid B en casa, sen ter aínda a permanencia pechada. O duelo terá lugar ás 20:00 horas e o club herculino anunciou que a entrada para o partido de play outsería de acceso libre e balde para toda a afección.
Esta mañá, en rolda de prensa, o técnico deportivista declarou que esta cita “é un partido máis, porque é un partido máis”, pero sen deixar de lado que “á vez é o partido máis importante da tempada”. Llorente admitiu que “é verdade que o partido do outro día tiñamos que telo gañado, incoscientemente tamén vas preparandoche para este día. Onte (no adestramento) non as vin mal. Obviamente poderiamos estar moitísimo mellor”.
O adestrador do Dépor ABANCA analizou tamén o cambio de rumbo que levou o equipo, entre os favoritos antes do parón de Nadal. “Todo vén a raíz do parón de Nadal. A primeira volta é moi boa, pero as vacacións non nos sentan ben. Perdemos contra o Espanyol, logo volvemos gañar dous partidos e nese momento chegan cinco lesións de moi longa duración que non pensabamos que ían durar tanto; máis a de Merino, cando nos confirman que os tres meses pasan a ser case seis. É un punto de inflexión clave”, argumentou.
Llornete engadiu que os cambios no banco obrigaron a mudar o erstilo de xogo: “A metade de camiño tes uqe cambiar de plan e improvisas outra menira de xogar na que eu non me sinto tan cómodo. Aínda así sacamos algún resultado positivo, pero o resto ou a maioría non son positivos. Con esas lesións, as xogadoras que nun momento dado nunha t empada ideal poderías rotar e facer que descansen, non descansan”.
Así, a acumulación de minutos pasou factura nas deportivistas, que tamén se viron afectadas polas tarxetas. Outro momento clave da tempada foi a polémica coa segunda adestradora, Ana González, que é “algo que ninguén espera”.
Llorente: “Non cometín ningún acto irregular contra ninguén”
Marxe de mellora
Tendo en conta a situación, Llorente afirma que “todos temos moitísimas cousas que mellorar e moitísimas cousas que facer, novas ou diferentes. Primeiro eu, por suposto, e en moitas cousas son o principal responsable, pero houbo un cúmulo de cousas, de situacións que non che pasan noutras tempadas que pasaron todas xuntas nesta e ao final, despois dunha primeira volta moi boa, foi unha segunda volta mala. Aínda así, despois desa primeira volta, en condicións normais nunha tempada normal, vas sexta, entón é unha tempada mala porque este equipo está feito para ascender pero quedas sexta. Esta tempada fai que todo se multiplique por 10 e esteas a piques de descender, aínda quedando sexta. É unha tempada peculiar, estraña, pero estamos onde estamos porque fixemos as cousas como as fixemos. Agora a xogar o martes e despois do martes, volver falar”.
Llorente: “Houbo un cúmulo de cousas, de situacións que non che pasan noutras tempadas”
O técnico tamén apuntou que ve “curioso que por un gol quedes fóra ou entres no playout, pero poderiamos solucionalo moitísimo antes. Se ese gol chégalo a meter hai cinco semanas ou chegas a gañar contra o DUX Logroño aquí contra 10, isto non existiría”.
Confianza no plantel no tramo final
Con apenas dous días de marxe entre o último partido de liga e o playout, apunta que a circunstancia que está a vivir o equipo é “anormal, igual que non é normal esta tempada a nivel de descensos, ascensos. É unha tempada diferente, por non dicir rara, entón para que esta tempada teña certo efecto, teñen que facer cousas raras. Eu creo que non o imos a ver en moito máis tempo. Tocounos vivir esta tempada aquí, pois a vivimos perfectamente”.
Iso si, destaca que “o martes é un lugar onde non teriamos que chegar, onde sabedes perfectamente que levo dicindo semanas que non penso e onde ao final por narices tiven que pensar”.
Llorente: “Todo o mundo quere terminar xa porque está a ser unha tempada moi intensa”
Percibe que “todo o mundo quere terminar xa porque está a ser unha tempada moi intensa, moi densa e (as xogadoras) son as mesmas da primeira volta. Teño unha confianza e un orgullo pleno cara a elas. É o seu momento. Levo semanas nas que me dou conta que non teño xa case incidencia nelas para ben. Mañá é o punto final. Teño moita confianza nelas, estou moi orgulloso deste equipo e fixemos cousas que eu nunca fixera en ningún outro equipo. Non teño dúbidas de que será un día bonito, histórico para o club e para nós“.
Chamamento á afección
Finalmente está convencido que “se aquí xuntamos 4.000 persoas gañamos seguro. Pero teñen que vir. Nós estamos a facer o chamamento a todo o mundo que mañá martes ás 8 chova ou non chova apetézalle ver ao feminino”.
A apertura de portas será ás 19:00 horas nos accesos de Tribuna Inferior, entre as portas 2 e 29.
