Só quedan cinco partidos para que remate a tempada na Liga Feminina 2, e no CB Arxil a permanencia non está asegurada, pero vense con opcións. “Estamos a tempo de pechar cun sorriso unha temporada dura, para min a máis dura de todos os tempos”, declara Lino López.
O equipo pontevedrés ocupa a novena posición da táboa, con seis vitorias e quince derrotas. Empatados a puntos con elas (27) está o Maristas Coruña, e cun punto menos están AD Cortegada, ADBA e Ulla Oil Rosalía. Algo máis lonxe está o Magec, con 24 puntos.
As dificultades por adestrar debido ás restricións motivadas pola COVID-19 non están impedindo que o Arxil acumule datos positivos e motivos para o optimismo. Lino Vázquez denuncia que “por primeira vez na historia do club non tiñamos pista no CGTD debido ás restriccións horarias do toque de queda e ao ter prioridade os becados”. Estas novas normas obrigaron ao equipo pontevedrés a adestrar no Multiusos.
Porén, as estatísticas mostran como pese aos contratempos, o Arxil sobresae en áreas como os rebotes ofensivos. Xunto ao Miralvalle é o mellor da LF2, cunha media de 11,2. Tamén destacan en balóns recuperados, sendo o terceiro mellor neste aspecto do xogo.
Na outra cara da moeda, o conxunto de Lino Vázquez é o equipo que perde máis balóns, cunha media de 19,2 por encontro. Tamén é o cuarto peor desde a liña de tres, cunha porcentaxe de acerto de só o 26,5%. Pero o aspecto que máis terán que traballar as verdes é os tiros libres, coa media máis baixa de efectividade, situada no 58,2%.
Segundo indica o propio Lino Vázquez: “se somos capaces de corrixir eses erros poderemos pelexar por gañar os cinco partidos que restan”.
Lino Vázquez: “Se somos capaces de corrixir eses erros poderemos pelexar por gañar os cinco partidos que restan”
Noutras áreas, a súa calidade é similar ao posto que ocupan na clasificación. O Arxil é o décimo equipo con mellor media de rebotes defensivos, e o noveno en asistencias. En xeral, son o décimo mellor valorado, con 50,5 puntos de media.
As mellores do Arxil de Lino Vázquez
Nas filas do equipo de Lino Vázquez destacan algúns nomes propios. Forster é a novena mellor reboteadora da categoría, mentres que Lago e Masía tamén entran no apartado.
En balóns recuperados Carla é a terceira mellor xogadora, coa súa compañeira Lago na sexta posición e Sara Castro na undécima.
