Lino Vázquez, membro do corpo técnico do CB Arxil, fala do arranque da competición que as pontevedresas vivirán esta tarde, sábado 10 de outubro, na Coruña ante o Maristas. O adestrador advirte que é preciso estar preparadas para calquera circunstancia nunha tempada que será moi atípica e chea de casuísticas diferentes polos protocolos de prevención da COVID-19.
A.N.: Este ano, máis aló dos condicionantes deportivos, existen moitos factores que poden alterar o campionato.
Lino Vázquez: Si e temos que estar preparadas para que se dea calquera circunstancia: para que haxa xogadoras apartadas algún tempo, para ter preparado unha viaxe e que non se poida xogar, para cambiar as cargas de traballo por suspensión de partidos… Temos que estar mentalizadas de que vai pasar de todo e ser positivas ante iso para que nos prexudique o menos posible.
A.N.: Por exemplo, apenas poder disputar partidos de pretemporada. Está satisfeito con este período de preparación?
Lino Vázquez: Foi unha pretemporada atípica, con menos partidos do normal, con moito coidado co tema de protocolos, coa chegada das xogadoras moi graduada por problemas coas viaxes… Pero no que se refire ao deportivo, estou contento, porque as xogadoras están moi implicadas e traballando moi ben. É un grupo moi nobre, que traballa ao máximo no día a día, moi xeneroso no esforzo e co equipo. O nove xogadoras que renovaron xa sabían a nosa forma de traballar e de entender o xogo, pero as novas tamén se adaptaron moi ben.
A.N.: Ademais de atípica, a pretemporada foi moi curta Como alcanzan o arranque da campaña?
Lino Vázquez: A todos os adestradores gustaríalles ter sempre máis tempo de pretemporada e máis partidos e traballar mais horas… e realmente esta pretemporada foi ‘mini’… Así que os primeiros partidos de liga serán case como de pretemporada, con moitos erros, de tentar coñecerse, adaptarse ao xogo…
A.N.: Polo menos manter a base do grupo xogará ao seu favor.
Lino Vázquez: Sen dúbida. Se tivésemos que formar o equipo desde cero sería máis complicado, porque a nosa forma de xogar é difícil de asimilar, porque hai moitas situacións por conceptos que o dificultan. Pero ter a xogadoras que coñecen o club e a forma de xogar facilita que as incorporacións se adapten moito máis rápido.
A.N.: En pretemporada gañaron con folgura a algúns dos que van ser os seus rivais no campionato e perdido moi xusto con outro. Será unha liga tan desigual como parece?
Lino Vázquez: Este ano hai equipos de Nacional que foron convidados a xogar en Liga Feminina 2 pola ampliación, pero son equipos amateurs e iso vai facer que a liga sexa moi desigual. Que ao final é baloncesto e podes perder contra calquera, pero si é certo que hai equipos con orzamentos e persoais pensados para estar na zona alta e outros que seguen tendo a mesma estrutura que se xogasen en Nacional.
