Unha xornada máis, o BAXI Ferrol asignase os dous puntos da vitoria, aínda que desta vez o partido ante o Extremadura Miralvalle Plasencia foi o resultado máis avultado do que vai de ano para as ferrolás. Cun 92-43 final, o cadro dirixido por Lino López reencontrouse coa súa mellor versión.
“Viñamos de dous partidos nos que nos custou moito, sobre todo defensivamente. Ao final gañamos folgados, pero creo que o equipo necesitaba ver ese traballo, esa efectividade, esa superioridade e despois ese acerto ofensivo”, analizaba o técnico no postpartido, en relación a este trunfo en comparación cos logrados ante Arxil e Cortegada.
Así, esta décimo sexta xornada (e vitoria) de LF2 mellorou a moral do equipo universitario, que logrou vencer a un rival que está terceiro “por méritos propios, cun quintento cun potencial físico moi grande e con xogadoras de moita calidade”.
O Miralvalle era un rival de altura para o BAXI, que confiou nas súas rotacións máis amplas para desgastar ao contrario na pista, mantendo un rápido ritmo de xogo en ataque e defensa.
Lino López: “Tiñamos claro que tiñamos que facer ese traballo defensivo de presionar, e de desgastar”
“Tiñamos claro que tiñamos que facer ese traballo defensivo de presionar, e de desgastar”, asegura Lino López. Así os resultados comezaron a verse pasados os dez primeiros minutos, cando “no segundo cuarto puxémonos por diante e puidemos romper o partido”.
A defensa zonal das visitantes non freou a ofensiva das ferrolás, que aproveitaron a ocasión para adiantarse desde as liñas exteriores, con especial acerto desde a liña de tres por parte de Patricia Cabrera, que asinou cinco dos dez triples do BAXI Ferrol.
A capitá estivo entre as máis destacadas do partido, pero o seu adestrador non subliña tanto a súa efectividade anotadora, como a súa labor defensiva. “É unha tiradora, nunha situación de zona ten moitas vantaxes, porque fai moitos tiros liberados. Pero xogou ben sobre todo no traballo defensivo, porque polas súas condicións físicas cústalle máis e hoxe tiña diante a xogadoras con máis físico e con talento”, recalca Lino López.
Lino López: “O máis importante é que xogadoras que non teñen o perfil que poden ter outras, eleven o seu nivel para poder estar a esa intensidade e ritmo defensivo”
Un factor que segundo o técnico ferrolán é “o máis importante. Xogadoras que non teñen o perfil que poden ter outras, eleven o seu nivel para poder estar a esa intensidade e ritmo defensivo durante todo o partido”, subliña.
Así, o BAXI acadou unha vitoria moi traballada, na que “houbo momentos de xogo moi bos, moi vistosos, con accións espectaculares e creo que o equipo necesitaba un partido a este nivel despois do Nadal para seguir traballando na mesma liña”, declaraba finalmente Lino López.
Brooke Salas estrearase pronto co BAXI de Lino López
Ademais, ao longo da semana o BAXI Ferrol verase reforzado coa chegada da súa última fichaxe: a americana Brooke Salas. Esta é unha xogadora moi completa, que “xa xogou en Liga 1 e polas súas condicións é unha xogadora xerosa, que le ben o xogo, que pasa ben e que vai buscar a mellor opción para o equipo”, di López.
“Tal e como está o equipo non necesitamos unha referente, unha anotadora ou unha xogadora que busque as súas estatísticas, necesitamos a unha xogadora de equipo, que veña sumar”, engade.
En definitiva, unha baloncestista para calquera situación, que “pode xogar interior, ten boa man e defensivamente vai dar un salto, porque é moi rápida de mans, ten esa capacidade defensiva. Coa baixa de Jenna vainos axudar a ter unha rotación máis e sumar”, declara o adestrador.
