Na derradeira xornada, previa ao parón na LF Endesa, o BAXI Ferrol de Lino López sumou a súa terceira derrota consecutiva. As galegas non puideron superar ao gran Perfumerías Avenida, segundo clasificado, pero o seu adestrador mostrouse orgulloso do traballo das súas xogadoras:
“É moi dificil atacar contra elas e defender pero o equipo demostrou na liña na que estivo nos 40 minutos que é un equipo competitivo que pode gañar a calquera”.
Para o preparador, “ese é o camiño a seguir cada dia, tratando as limitacións”. Por iso, malia a derrota na Malata, López está “moi contento coa actitude mostrada durante os 40 minutos”. O entrenador asegura que tanto na pista como no banco, cada xogadora “deu o seu máximo” e ao final, ese é o conxunto que “quero ver na pista e cada día”.
Reaccións nos minutos finais
Despois de estar todo o partido baixo mínimos anotadores, o equipo ferrolán deu a sorpresa no último cuarto, asinando un gran parcial que porén non foi suficiente para a remontada. Preguntado por este cambio no rendemento, o adestrador considera que o esforzo do BAXI foi constante en todo o duelo.
“Elas ao principio anotaron con maior facilidade porque teñen xogadoras con moito físico e moito talento, polo que non é facil defendelas. Pero o equipo seguiu pelexando, creo que o público o viu, non só no último cuarto. Quizais viuse máis porque elas non eran capaces de anotar, pero en liñas xerais o equipo sempre está e ese é o camiño”, apunta Lino López.
Lino López: “O equipo seguiu pelexando, creo que o público o viu, non só no último cuarto”
A clave na derrota, ademais do bo xogo do Perfumerías Avenida, estivo nos erros das ferrolás nos tiros liberados, “que non son fáciles de tirar contra un equipo que defende como o Avenida”. Con todo, López está contento co traballo do seu equipo e asegura que “esa é a liña. Non estás acertada, pero estás intensa, pelexando cada xogada e aínda que non esteas acertada es capaz de competir”.
O preparador salientou ademais a actitude de todo o plantel, independentemente das dificultades ou da situación do partido. “Saía unha xogadora que tirara dous tiros que non tocaban aro, pero seguía pelexando con inferioridade física ou apoiando no banco. Cada xogada e cada defensa celébrase e iso marca a liña do equipo. Nesa liña o equipo vai ser competitivo”, asegura.
“Todas deron o seu máximo e iso é o máis importante”, subliña López.
Preocupación por Allen e baixa de Taylor
No encontro, Jenna Allen sufriu un golpe que por fortuna non afectou ao seu tendón. Lino López explica que, aproveitando o parón que vén na categoría, a xogadora poderá descansar e traballar a lesión que arrastra. “É un traballo para chegar despois das ventás o mellor posible. Esperemos que xa podendo axudar en pista máis minutos como tiñamos a idea hoxe”, engadiu.
Unha baixa que sufriu o equipo foi a de Taylor, condicionando ao equipo no físico e no apartado anotador. A xogadora poderá volver pronto ás pistas, xa que non acudiu á convocatoria por ter que arranxar uns papeles do visado.
