“Unha sensación irrepetible”. Así definía Lino López o ascenso do BAXI Ferrol a LF Endesa, despois dunha tempada cun pleno de vitorias e sendo xa xustas xogadoras da máxima categoría do baloncesto español. “Por iso son adestrador e amo o baloncesto”, engadía.
Máis aló do éxito da promoción, esta foi unha tempada para enmarcar en Ferrol. As baloncestistas da cidade departamental quedaron invictas e puideron festexar esta fin de semana por todo o alto que xa son equipo da primeira división.
A certificación do ascenso chegou cunha vitoria 81-72 ao Osés Construcciones Ardoi, tras unha espectacular remontada na segunda metade do encontro. As azulonas sumaron o derradeiro trunfo, o máis importante, e despiden a tempada en LF2 finallizando o curso con 29 de 29 vitorias.
Lino López: Orgulloso e feliz
O adestrador ferrolán desfacíase en eloxios para xogadoras e corpo técnico tras o partido que lles deu o ascenso. Lino López quixo destacar ante os micrófonos a todo o seu equipo, que describiu como “unido, un equipo que cre no que está a facer, que pone por riba das expectativas individuais ao equipo, que cre cada día, que traballa ao máximo e é capaz de darlle a volta ao partido como foi hoxe (en referencia ao domingo)”.
Lino López: “Somos un equipo unido, un equipo que cre no que está a facer, que pone por riba das expectativas individuais ao equipo”
O técnico subliñou tamén o traballo do corpo técnico, que dan “o seu máximo, ao igual que as xogadoras”. López tivo palabras de agradecemento para cada un dos membros do staff e tamén da directiva, como Leopoldo Ibáñez, “que foi quen apostou por min para unirme á familia do Universitario Ferrol“. O adestrador acordouse tamén das xogadoras que non pudieron estar presentes na fase de ascenso debido á pandemia e da súa familia, “que me apoia cada día e aguanta os meus enfados”, pero especialmente da súa filla, “a fan número 1”.
Lino López: “Non podo estar máis orgulloso desta xente. Feliz”
“Non podo estar máis feliz”, declaraba Lino López, visiblemente emocionado. Á alegría de ter pasado de categoría, engade o feito de facelo cun grupo humano así: “Non podo estar máis orgulloso desta xente. Feliz”, resumía.
Sergio Jaurena e Sandra Prieto súmanse á celebración
Ás declaracións de celebración do ascenso de Lino López uníronse tamén Sergio Jaurena, o preparador físico do grupo ferrolán e Sandra Prieto, adestradora axudante do BAXI Ferrol. O primeiro deles pouco tivo que engadir ás palabras de agradecemento do técnico, “aínda que á súa familia non a coñezo, pero por aguantalo”, bromeaba.
Sergio Jaurena (preparador físico): “Foron tres partidos en catro días, con 120 minutos coa esixencia máxima de cada equipo”
Centrándose nesta Fase Final, Jaurena sinalaba o esforzo realizado en “tres partidos en catro días, con 120 minutos coa esixencia máxima de cada equipo”. O preparador tamén quixo recordar o mérito de vencer neste último partido ao Ardoi, “que foi o rival máis duro da tempada”, pero subliñando que todo mereceu a pena: “Para isto metemos 20-25 horas semanais de adestramneto en pista, ximnasio e todo. Para isto comezamos en setembro”.
Jaurena tamén se acordou da súa familia e a súa moza, e destacou o incrible deste ano polo “grupo fantástico de xogadoras e corpo técnico. Con todo o staff e toda a directiva sempre volcada. Un ano incríble que esperamos que o ano que ven en Liga 1 sexa igual”, remata.
Sandra Prieto (adestradora axudante): “Este partido foi o resumo dunha tempada”
Pola súa banda, Sandra Prieto concluía que “este partido foi o resumo dunha tempada”. A adestradora axudante remarcou todo o esforzo destras deste ascenso: “hai que traballar moito, que pelexar cada minuto e cada día para chegar ata o final”. A recompensa final de estar na primeira categoría “durante moito tempo” chegou dun traballo ben feito e a “ilusión”, apunta Prieto.
