O BAXI Ferrol dirixido por Lino López comezou o 2021 cunha vitoria en casa, a décimo cuarta da tempada, que as mantén como líderes invictas da Liga Feminina 2. Pero non foi sen loitar, xa que o CB Arxil demostrou ser un rival máis duro do que demostra a clasificación e soubo poñer ás ferrolás contra as cordas.
Con todo, o alto nivel das baloncestistas de Ferrol e o seu fondo para manter a presión durante os 40 minutos de partido foron a clave para que o BAXI aínda non coñeza a derrota. “O equipo necesita manter o ritmo, da igual que vaias arriba gañando de 20, que que vais abaixo. Co partido roto o equipo segue pelexando e iso é clave”, sinalaba o adestrador ferrolán, Lino López, tras o partido.
A constancia, seña de identidade do BAXI de Lino López
O equipo dirixido por Maite Méndez foi o primeiro en lograr esta tempada adiantar ao BAXI na súa casa. O primeiro cuarto caeu do lado visitante, xa que as universitarias víronse “superadas na primeira liña de presións e en situacións de un contra un, o que nos fixo estar sempre a remolque”, explicaba López.
Lino López, técnico doBAXI Ferrol: “Todas as xogadoras están moi implicadas. Saben o traballo que teñen que facer e síntense importantes, da igual cando saian. Iso e fundamental”
Pero para o adestrador, esta actitude de manter a intensidade sen importar o resultado é unha das señas de identidade do equipo. Ademais, recordou que “todas as xogadoras están moi implicadas. Saben o traballo que teñen que facer e síntense importantes, da igual cando saian. Iso e fundamental”, recalca.
Segundo Lino López, aínda que algunha xogadora poida estar menos acertada o equipo como conxunto é “capaz de remontar e lograr o nivel e manter esa liña de intensidade os corentaminutos. Iso é o que nos fai moitas veces capaces de romper os partidos e os contrarios non son capaces de aguantar ese ritmo tanto defensivo como ofensivo. A esixencia é máxima en cada minuto”, recorda.
Lino López, adestrador do BAXI Ferrol: “A esixencia é máxima en cada minuto”
Un rival duro “construido para estar arriba”
O Arxil chegaba con 12 puntos menos ao encontro, pero a diferenza sobre a táboa non se puido ver sobre a pista. “O partido foi moi duro, sobre todo na primeira parte, con moitas situacións de moitos contactos e ningunha canastra fácil. Sobrepasáronnos moitas veces en situación de presión e en ataque non estivemos cómodas xogando”, confesaba o técnico local.
Todo cambiou na segunda metade, cando “puidemos poñernos ao seu nivel de durezza e puidemos romper o partido”, explica.
Nas súas palabras, o cadro pontevedrés está “construido para estar arriba, na fase de ascenso e nas primeiras posicións e sen embargo está nos postos de abaixo. Necesita esa intensidade e dureza na segunda volta para cambiar a dinámica da primeira”.
Por estes motivos, foi un contrincante moi duro e esixente “pero o equipo respondeu ben”. Tamén foi vital o apoio do público desde a bancada, que logrou animar ás xogadoras locais e levalas á vitoria.
