O BAXI Ferrol de Lino López afronta a fase de ascenso a LF Endesa despois dunha primeira parte da competición cun pleno de vitorias. 26 xornadas sen fallar que fan que o conxunto galego chegue como un dos favoritos á promoción.
“Creo que estamos moi ben. Chegamos á fase nas mellores condicións”, asegura o técnico ferrolán, que comenta que a nivel físico “o equipo está moi ben e afronta a fase con moitas ganas. Despois de facer unha tempada ata agora perfecta, imos con moitas ganas de redondealo coa fase de ascenso”.
Lino López: “Despois de facer unha tempada ata agora perfecta, imos con moitas ganas de redondealo coa fase de ascenso”
Porén, o BAXI non é o único equipo que chega en plena forma a esta parte da competición. O Barça tamén chega invicto e o Leganés só perdeu o último partido, polo que Lino López cree que “son os rivais que chegan máis fortes a este final de tempada”.
BAXI e Celta xa coñecen os seus grupos para loitar polo ascenso a LF Endesa
A última parte da LF2 está a piques de empezar e en Ferrol están desexando que de comezo. “Despois dunha tempada como foi, nunha situación difícil e de tensión como é unha pandemia, coas xogadoras sempre coidándose, practicamente nunha situación de burbulla, todas estas ansiosas pola fase de ascenso. Oxalá podamos desfrutar igual que toda a tempada”, declara o adestrador.
Así ve Lino López ao Grupo 3
As ferrolás competirán no Grupo 3, que as enfrontan a Advisoría Maresme, cuarto clasificado do Grupo C, e UCAM Primafrío Jairis, terceiro do Grupo B.
Sobre as primeiras, Lino López destaca a experiencia do seu plantel e da ex xogadora do BAXI, Mireia Vila. En liñas xerais considera que as catalás “chegan á fase de ascenso sen ningunha presión e con xogadoras desa experiencia que poden gañar a calquera equipo”.
A nivel individual sinala a Cristina Hurtado e Olga Ruano como dúas pezas claves e as describe como “xogadoras que non lles vai tremer a man á hora de afrontar a fase de ascenso porque están moi acostumadas a xogar este tipo de partidos”.
No relativo ao Jairis, Lino López tamén fai referencia a ex ferrolás como Miscenko ou Tudanca, pero apunta a Breedlove, como unha xogadora que permitiu que o equipo dera “un salto en canto a competitividade e equilibrio”. A americana ten experiencia en LF Endesa despois de ter xogado coa camiseta do Durán Maquinaria Ensino.
Ademais, sobre este conxunto destaca o resultado da última xornada, na que foron quen de vencer ao entón invicto Leganés. “Foron de menos a máis e seguro que xogarán co obxectivo claro, como todos os equipos da competición”, reflexiona López.
O BAXI confía no seu plantel
O único hándicap que encaran as galegas nesta fase de ascenso é a baixa de Irene Gari. A baloncestista está a recuperarse dunha lesión despois de mancarse cunha microrrotura no quencemento do partido ante o Celta Zorka Recalvi.
“Evidentemente é un contratempo moi grande porque é unha xogadora moi importante para nós”, asegura Lino López. Con todo, o adestrador terá ao resto das súas xogadoras á súa disposición e confía plenamente nelas.
Lino López di que a lesión de Irene Gari é: “Evidentemente é un contratempo moi grande porque é unha xogadora moi importante para nós”
Como punto forte do BAXI, o técnico destaca ao equipo no seu conxunto. “Tivemos contratempos como a lesión de Jenna Allen, que era unha das referentes do equipo, e todas as xogadoras deron un paso adiante”, recorda. Tamén fala sobre a chegada de Brooke Salas, quen adptouse perfectamente á dinámica do club.
O adestrador móstrase orgulloso das súas baloncestistas, das que asegura que “sempre que houbo unha baixa ou un contratempo como agora o de Irene, todo o equipo xogou a un gran nivel, como se demostrou contra Vigo e creo que esa é unha das claves”.
Lino López: “O ritmo de xogo é moi alto. Creo que esa é unha das nosas mellores virtudes”
Nunha fase onde a tensión é máxima e os partidos xóganse case sen descanso, ser capaces de realizar moitas rotacións será vital. Neste sentido, Lino López destaca sobre o seu plantel “o ritmo que imprimimos ao xogo tanto ofensivo como defensivo e que todas as xogadoras son importantes, a que máis xoga, xoga 24 minutos e a que menos, 16 minutos, polo que o ritmo de xogo é moi alto. Creo que esa é unha das nosas mellores virtudes”.
As ferrolás aínda non coñecen a derrota, pero poderán enfrontala na fase de ascenso
O BAXI Ferrol aínda non tivo rival que o vencera, pero iso pode cambiar nunha fase de ascenso rifada, na que a igualdade é máxima. Porén, o conxunto de Lino López chega preparado.
“Unha derrota na fase seguramente déixate fóra das opcións de ascenso. Traballamos todo o ano cun nivel de esixencia alto independentemente do resultado, preparándonos para traballar estas situacións. É baloncesto, é deporte e pódese dar calquera resultado. Pero se o equipo da o máximo e todas as xogadoras priman o colectivo, estaría contento e orgulloso, porque é o máis importante”, conclúe.
