Esta xornada de LF Endesa deixa unha cita importante no baloncesto galego, co derbi entre o BAXI Ferrol e o Durán Maquinaria Ensino. En palabras do adestrador local, Lino López, esta será “unha boa ocasión para desfrutar dun derbi entre os equipos que están nunha das mellores ligas de Europa, para min seguramente a mellor agora mesmo”.
Neste encontro, os dous clubs chegan na zona baixa da táboa, pero con moito por decidir nunha longa Liga Endesa.
Lino confía no seu plantel polivalente
Coa recuperación de Suné Swart e Jenna Allen, o conxunto ferrolán vese listo para disputar o derbi galego, malia chegar dunha derrota ante o duro Valencia. “O equipo, co traballo do día a día e semanal está listo e mellor para afrontar un derbi como o que imos ver”, declara o seu preparador a As Nosas.
De cara ao duelo deste sábado, Lino explica que a clave para as universitarias estará en “levar nós o ritmo de partido”. O adestrador apunta que “temos a un plantel con polivalencia, con xogadoras que dependendo das defensas son capaces de facer distintas situacións ofensivas e creo que todas as xogadoras son ameaza no tiro exterior, o que tamén condiciona á defensa”
Lino López: “Temos a un plantel con polivalencia, con xogadoras que dependendo das defensas son capaces de facer distintas situacións ofensivas”
Segundo apunta Lino López, “temos que facer o noso xogo, levar o ritmo de partido e creo que iso é clave para o partido ante o Ensino”.
Rival con xogadoras de “primeiro nivel”
Enfronte, as ferrolás terán a un Ensino do que o técnico universitario asegura que “ten xogadoras de primeiro nivel. Xogan a un ritmo moi alto, defensivamente son moi intentensas e agresivas durante os corenta minutos e iso condiciona sempre aos rivais”. En poucas palabras, “teñen un plantel moi completo en todas as posicións”.
Ademais, con xogadoras como María ou Oma recuperadas das súas lesións, estas baloncestistas poderán subir o nivel das lucenses no derbi galego, segundo advirte Lino López.
Ao favor do BAXI estará o factor cancha, disputando o encontro na Malata ferrolá. “É moi importante, porque sempre temos moito público, unha masa social grande que sempre está apoiando ao equipo nos bos e malos momentos e será fundamental para nós neses momentos”, asegura o preparador.
Liga disputada
Nesta tempada, a parte baixa da LF Endesa está moi igualada, con equipos pelexando cada xornada por saír do pozo. Un deles é o BAXI, pero o adestrador asegurou que “tiñamos claro desde o principio que tiñamos que traballar pensando en nós no día a día, sabendo que íamos ter momentos difíciles. É moi difícil conseguir unha vitoria nesta liga tan potente e tan competitiva pero o equiop está mentalizado niso, en seguir traballando e seguir medrando colectiva e individualmente e intentar que o equipo sexa cada semana mellor”.
Lino López: “Tiñamos claro desde o principio que tiñamos que traballar pensando en nós no día a día, sabendo que íamos ter momentos difíciles”
Ás veces conseguirase, e outras non, engade o técnico, que insiste en que “ter a mentalidade de seguir mellorando e estar ao 100% cada día creo que é clave e é o que estamos conseguindo”.
O adestrador do Ensino, Miguel Ángel Ortega, aseguraba na súa rolda de prensa que as universitarias son un conxunto que medra ao longo da tempada, o que é mostra do bo facer do corpo técnico. Ante iso, Lino López confirma que “teño esa sensación de que o equipo está medrando, traballando ben, as semanas de adestramentos son moi boas. Evidentemente tes que reflectilo en cada partido e con ese obxectivo imos o sábado contra o Ensino“.
“O noso obxectivo era facer un equipo competitivo e que dera o máximo cada día. Entón, creo que iso o público o agradece, se ve que o teu esforzo é máximo e ve que aínda que sexas inferior fisicamente ou tecnicamente, o equipo pelexa cada balón e traballa para o ben do equipo e é fundamental”, afirma Lino López.
Lino López: “Oxalá que cada vez se sumen máis afeccionados ao baloncesto feminino galego”
Finalmente, o técnico mandou unha mensaxe á afección do baloncesto galego: “Quero agradecerlles o apoio e que sigan apostando por ver o baloncesto feminino. É un orgullo para todos e oxalá que cada vez se sumen máis afeccionados ao baloncesto feminino galego”.
