Regresa o público á Sangriña. Até 300 espectadores poderán gozar o sábado do partido correspondente á terceira xornada da liga Guerreras Iberdrola que no Grupo A medirá ao Club Balonmán Atlético Guardés e ao Uneatlántico Pereda (19:00 horas).
Tras xogar a porta pechada o primeiro partido de liga contra o Lanzarote – Puerto del Carmen, a favorable situación epidemiolóxica da Guarda permite que este encontro poida celebrarse con público nas bancadas.
Os socios do Atlético Guardés na tempada 2020-2021 deberán retirar na oficina da Sangriña o seu reserva de asento para o partido do sábado co Uneatlántico Pereda. Atenderase en horario de 16:30 a 20:30 horas o xoves e venres e o sábado de 11 a 13 horas da mañá e despacharanse até un máximo de 300 entradas.
As persoas socias, segundo informa o club da Guarda, deberán presentar no momento de retirar o seu reserva o carné de socio acompañado do DNI, xa que os carnés como vén sendo habitual serán persoais e intransferibles.
Os deportistas da base do club guardés terán que ir acompañados dun adulto responsable posuidor do carné de socio asociado. Ademais, facilitarase unha declaración responsable que debe ser cumprimentada e devolta o mesmo sábado na entrada do pavillón.
Hai que seguir o protocolo COVID da Sangriña
En todo momento, seguiranse as indicacións e medidas sanitarias estipuladas no protocolo que o Concello da Guarda elaborou para a instalación deportiva municipal. Dado o control de aforamento, os socios que non poidan asistir a este partido terán preferencia para a quinta xornada de Liga Guerreras Iberdrola: Club Bm. Atlético Guardés – Aula Alimentos de Valladolid (sábado 24 de outubro ás 19 h, A Sangriña).
- Todos os asistentes ao partido deberán realizarse un autotest e non deberán presentarse na Sangriña en caso de ter algún síntoma compatible co COVID-19: febre, tose seca?
- As portas da Sangriña abriranse ás 17:30 horas e permitirase o acceso até quince o minutos antes do inicio do partido (18:45 horas).
- Na entrada da Sangriña requirirase DNI, carné de socio e ticket de reserva. Ademais deberá entregarse a declaración responsable debidamente cumprimentada e asinada.
- Para acceder á Sangriña será obrigatorio o uso en todo momento da máscara.
- Seguindo o protocolo da instalación municipal haberá control de temperatura na entrada, xel hidroalcohólico e unha alfombra de desinfección e deberá seguirse en todo momento a señalética de corredores e bancadas, que marcarán os percorridos de acceso e saída do pavillón.
- Os menores de 7 anos non poderán ocupar butaca, tendo que sentar no colo do adulto acompañante.
- Limitarase o uso dos baños.
- Os espectadores serán sentados por orde de chegada, permanecendo no seu asento todo o tempo salvo causa de forza maior.
Calquera dúbida será resolta no enderzo electrónico: coordinador@balonmanatleticoguardes.com.
