As primeiras liñas portuguesas Patrícia Lima e Sandra Santiago pechan a serie de renovacións no Mecalia Atlético Guardés. Ambas xogadoras chegaron hai un ano ao Guardés desde o Colégio de Gaia co reto de adaptarse ao balonmán español e o paso do tempo foi permitíndolles explotar en ‘O Inferno’.
Coa confirmación de Lima e Santiago, Prades asegúrase a continuidade do groso da plantilla con trece renovacións á espera de fichaxes: Carratú, Sempere, Pérez, Buforn, Descalzo, Gómez, Valero, Urban, Mazza, Morais, Barbosa, Lima e Santiago.
Patrícia Lima: “Quedámonos a medias nun ano moi bo”
A central portuguesa Patrícia Lima foi o verán pasado a primeira incorporación dun renovado Atlético Guardés. Case un ano despois, Lima postúlase como unha das pezas crave do plantel 20-21 no posto de central tras a baixa de Carmen Campos. Chegou á Guarda co dobrete de campioa nacional e Taça de Portugal -tamén na 16/17- e co recoñecemento como mellor xogadora do campionato portugués 16/17.
Aos poucos, Lima foi deixando no parqué da Sangriña escintileos da súa calidade e poderá volver facelo a próxima tempada: “Quedámonos a medias nun ano moi bo”, lamenta, “un ano onde todas estabamos ilusionadas co que poderiamos facer”. Iso si, vaticina que “o próximo ano será a continuación do bo traballo que levabamos”, adianta Lima.
Lima, xogadora do Guardés: “Quedámonos a medias nun ano moi bo. O próximo ano será a continuación do bo traballo que levabamos”.
A primeira liña, internacional co seu país, móstrase satisfeita coa súa continuidade e a posibilidade de seguir xogando na Sangriña: “Estou feliz por formar parte un ano máis do gran equipo que é Guardés. Faime moita ilusión continuar xogando en ‘O Inferno’, aí síntome en casa”, confesa.
Sandra Santiago: “Mostraremos todo o que non puidemos facer a tempada pasada”
A lateral esquerdo Sandra Santiago, xa compañeira de Lima no Colégio de Gaia, tamén continuará ás ordes de José I. Prades. Santiago, que demostrou a súa versatilidade e potencia de lanzamento desde 9 metros, pronunciouse na mesma liña que o resto de renovadas asegurando estar “moi feliz” de poder continuar outro ano máis no Guardés: “neste equipo tan marabilloso que me recibiu tan ben”, agradece.
Santiago, con actuacións notables esta campaña, tamén lamenta o adeus do curso deportivo: “Foi unha mágoa que esta tempada terminase como o fixo”, confesa, “pero estou segura de que nesta nova tempada mostraremos todo o que non puidemos facer a campaña pasada”, desexa a xogadora.
Lima, xogadora do Guardés: “Foi unha mágoa que esta tempada terminase como o fixo. Estou segura de que nesta nova tempada mostraremos todo o que non puidemos facer a campaña pasada”.
Tanto Lima como Santiago parecen superar con nota a súa adaptación ao balonmán español e a próxima tempada seguirán na Guarda coa súa progresión. Tras deixar a Liga Guerreiras Iberdrola en terceira posición, o Guardés espera confirmación do calendario deportivo da próxima tempada coa disputa da División de Honra, a Copa da Raíña e a EHF European Cup.
