A Real Federación Española de Balonmán, a través do Departamento de Competicións, anunciou a data para celebrar o sorteo do calendario da tempada 2020/2021 da Liga Guerreras Iberdrola: será o vindeiro luns 22 de xuño, a partir das 11:00 h.
Este sorteo poderase seguir en directo a través de Facebook Live no perfil oficial da Liga Guerreras Iberdrola. Os conxuntos galegos participantes nesta categoría: Conservas Orbe Porriño e Mecalioa Atlético Guardés, estarán moi atentos ao calendario que lles tocará en sorte para a vindeira tempada 2020-2021.
Formato da competición
Os 16 conxuntos participantes na máxima categoría do balonmán feminino quedarán divididos en dous grupos de 8 equipos cada un.
Xogarase unha primeira fase en sistema de dobre volta, todos contra todos. Os catro primeiros clasificados de cada grupo disputarán unha segunda fase polo título, mentres que os catro últimos clasificados disputarán unha segunda fase pola permanencia.
En ambas, os equipos enfrontaranse nun sistema de dobre volta fronte aos rivais do outro grupo, arrastrando resultados e puntos dos rivais da primeira fase. Descenderán os catro peores equipos en dita segunda fase pola permanencia.
A Liga Guerreras Iberdrola comezará o 12 e 13 de setembro
A distribución de grupos será a seguinte:
Grupo A | Super Amase Bera Bera, Mecalia Atlético Guardés, Rincón Fertilidad Málaga, Aula Alimentos de Valladolid, Zubileta Evolution Zuazo, San José Obrero, Atlántico Pereda e Lanzarote Puerto del Carmen.
Grupo B | Balonmano Elche, Liberbank Gijón, KH-7 Granollers, Rocasa Gran Canaria, Salud Tenerife, Conservas Orbe Porriño, Balonmano Morvedre e Adesal Córdoba.
