Arrinca a Liga Galega Feminina de 2ª División, coñece os equipos de cada grupo, o calendario e o sistema de competición

Un total de 36 equipos distribuídos en sete grupos, segundo criterio xeográfico, volverán vestir de curto esta próxima fin de semana para disputar a primeira xornada da primeira fase na Liga Galega Feminina de Segunda División.

Esta competición, do mesmo xeito que o resto das organizadas pola Real Federación Galega de Fútbol (RFGF), terá un formato exprés e celebrarase en dúas fases para dirimir as dúas prazas de ascenso á Liga Galega Feminina de Primeira División, tal e como informa o propio ente federativo.

Seis dos grupos contan con cinco equipos e un deles, o Grupo B, terá seis conxuntos na primeira das fases de competición.

En canto á prevención da transmisión da COVID-19 nesta categoría, se aplicará o Protocolo FISICOVID – DXTGALEGO da Real Federación Galega de Fútbol (RFGF) para as categorías senior que obriga á realización de proba de COVID-19 cada 14 días como medida de protección diante da pandemia de coronavirus para todas as persoas intervintes na competición tanto en adestramentos coma nos partidos.

Formato de competición con dúas fases, a primeira, a dobre volta

No que atinxe ao formato de competición, a Liga Galega Feminina (LGF) de Segunda División, a RFGF explica nunha circular que consta de dúas fases. Na primeira desas fases de xogo os equipos participantes de cada grupo (lembremos que son sete repartidos por zonas xeográficas) enfrontaranse entre si a dobre volta mediante o sistema de puntos, establecéndose a clasificación final conforme os puntos obtidos por cada un dos equipos contendentes, a razón de tres puntos por partido gañado, un por empatado e cero por perdido.

Partido entre o Lóstrego e o Rosalía / EFF Rosalía — Imaxe de arquivo dun partido entre o Lóstrego e o Rosalía, dous equipos que competirán na categoría / EFF Rosalía

A esta primeira fase da Liga Galega Feminina de Segunda División corresponden un total de 10 xornadas de liga en cada grupo, accedendo á 2ª fase o primeiro clasificado de cada un dos grupos, así como o segundo mellor clasificado de todos os grupos, definido este polo coeficiente de deportividade (xogo limpo).

Na segunda fase muda o sistema de competición. Participarán os oito equipos clasificados da primeira fase que se enfrontarán en formato de eliminatorias para dirimir dúas prazas de ascenso á Liga Galega de Primeira División Feminina.

Configuraranse as primeiras eliminatorias en formato de semifinais mediante o oportuno sorteo, disputando os vencedores a segunda e última eliminatoria para dirimir as dúas prazas de ascenso.

Todas as eliminatorias disputaranse a partido único. As semifinais disputaranse no campo do equipo extraído en primeiro lugar no momento do sorteo, fóra da eliminatoria na que interveña o mellor segundo, na que este sempre exercerá de visitante; mentres que as finais polo ascenso disputaranse en campo neutral sinalado para os efectos pola Real Federación Galega de Fútbol (RFGF).