Empeza a rodar a Liga Galega de Roller Derby este sábado en Vigo co concurso dos clubs: Sereas Bravas (Vigo), Jabatas (Ourense), Brigantias (A Coruña), Irmandiñas (A Coruña). Algúns deles presentan varios equipos á competición.
Os catro primeiros partidos da Liga Galega de Roller Derby disputaranse este sábado ás 12:00, 14:00, 16:00 e 18:00 horas no Pavillón Polideportivo do Berbés, en Vigo. O equipo local vigués, Sereas Bravas, é o encargado de organizar esta xornada na que participan máis de 50 persoas que estarán na pista formando parte de cinco equipos.
Partidos sa Liga Galega de Roller Derby
Participan nesta Liga Galega de Roller Derby dende Ourense Jabatas, dende A Coruña Brigantias (que presenta o seu “A” e “B”), e máis Irmandiñas; e de Vigo Sereas Bravas. As olívicas enfróntanse ás campioas da tempada pasada, Brigantias A, no terceiro partido (16:00 h).
Pero ademáis desta nutrida presenza en pista, os partidos tamén contarán coas correspondentes equipos de Oficials (árbitros) e numeroso bloque de NSO (Non skate oficials) que se encarga de axudar nas numerosas tarefas que se requiren nun partido de Roller Derby, dende manexar o marcador ata levar cómputo das faltas ou manter o bo estado da pista.
Dende Sereas Bravas lembran que o acceso o pavillón do Berbés é de balde e agardan “contar con público que poida descubrir este espectacular deporte e anime á equipa viguesa neste importante encontro”.
Que é o Roller Derby
O Roller Derby é un deporte de contacto, velocidade e estratexia orixinario dos Estados Unidos. Xógase en patíns tipo quad ou tradicionais e ten como obxectivo conseguir que a corredora do equipo (jammer) supere ás bloqueadoras (blockers) do equipo contrario anotando así o máximo posible de puntos.
Ambos equipos, de cinco persoas, xogan simultaneamente en períodos de dous minutos denominados jams. Os partidos xóganse en dúas partes de 30 minutos e nunha pista plana ovalada.
A Liga Galega de Roller Derby xógase conforme as normas establecidas pola Women´s Flat Track Derby Association (WFTDA) que establece requirimentos claros sobre o equipamento das xogadoras (casco, proteccións, bucal…), sobre as zonas de impacto legal e sobre a identificación da jam mediante unha estrela e da pivot con unha raia nos cascos.
Trátase dun deporte de alta intensidade con moito dinamismo e emoción que ten conseguido captar a numerosas xogadoras e seguidoras tanto en Vigo como no resto de Galicia. Seres Bravas adestra dous días á semana no Pavillón do Berbés con sesións abertas para coñecer de xeito directo esta disciplina do patinaxe.
