Os equipos do sur de Galicia da Liga Feminina 2, agás o Cortegada, desprázanse esta fin de semana fóra da comunidade. As de Pontevedra, C.B. Arxil, terá unha cita moi importante ante o Añares Rioja. O obxectivo primordial do partido basarase en competir neste duro encontro. Por parte das da cidade olívica, o Celta Zorka Recalvi, buscará ante o GDKO Ibaizabal achegarse aínda máis a fase de ascenso.
Competir, competir e competir
O Añares Rioja será o rival do Arxil este sábado (22 de febreiro, ás 18.00 horas) no polideportivo de Azpeita. As locais atópanse na zona intermedia da táboa. Son novenas con 2 puntos máis cas pontevedresas. Veñen de gañar o fin de semana pasado ante o Pozuelo por un 60 a 62.
As verdes teñen que ter moi en conta a dupla Fequiere-Nunn. Sobre as dos xogadoras xira o xogo de Añares Rioja ISB. A parella lidera o grupo A na valoración, sendo Jessica Fequiere a máxima anotadora cunha media de 20,9 puntos e Nunn a terceira reboteadora con 9,7.
No encontro de ida, as dúas xogadoras firmaron números ostebsiblemente debaixo dos seus promedios habituais, polo que conter o seu xogo antóllase fundamental. As pontevedresas venceron por tan só dous puntos de diferenza ás de Añares no CGTD. Carla Fernández fixo 26 de puntos fronte os 29 de Jaisa Nunn.
Pero non só elas teñen perigo neste plantel pois está formado por xogadoras nacionais como a ex do IDK, Sara Iparaguirre, a ex NCAA Cecilia Muhate e a capitá Intza Lizarazu que arroupan un quinteto dirixido baixo a batuta da serba Andela Radovic. Un bo conxunto con maior potencial do que inidica su clasificación actual.
No seo do Arxil a ilusión por bandeira, desprazará a todas as xogadoras dispoñibles e tentarán defender , rebotear e sobre todo competir nun duro encontro. As de Maite Méndez veñen de perder na casa ante o Patatas Hijolusa polo que levan dous partidos sen coñecer a vitoria. Son undécimas con 23 puntos.
DATOS DE INTERESE
DÍA E HORA: 22 de febreiro, ás 18.00 horas.
CAMPO: Polideportivo Municipal de Azpeitia – Azpeitia.
ÁRBITROS: Jesús Criado García e Manuel Berbeira Oria.
INCIDENCIAS: Partido correspondente a xornada 19 da Liga Feminina 2 que enfrontará ao Añares Rioja e o C.B. Arxil no Polideportivo Municipal de Azpeitia.
A polo play off da Liga Feminina 2 ante o Ibaizabal
O Celta Zorka Recalvi é quinto na clasificación xeral empatado a puntos co Sinergia Canoe. O sabado (22 de febreiro, ás 19.00 horas) aterran en Vizcaia para enfrontarse ante o GDKO Ibaizabal. O rival está un punto por riba tamén empatado co Pacisa Alcobendas. Levan unha racha de dúas vitorias (Cortegada e Laboratorios Ynsadiet Leganés) fronte as 3 das viguesas (Patatas Hijolusa, Añares Rioja e Ausarta Barakaldo).
O partido ante este rival presenta moitos alicientes. Dun lado o equipo viscaíno levou a vitoria en cancha celeste por unha apertada marxe (66-68) polo que unha vitoria celeste por máis de dous puntos tería un valor dobre. Elo Edeferioka, Ainhoa Lacorzana e Breanna Richardson salientáronse no partido pero Marta Miscenko, a ex xogadora do Baxi Ferrol, endosou 20 puntos sendo a mellor valorada.
Para Cristina Cantero, adestradora celeste, o partido será “complicado por moitos factores”. Entre eles apunta a “a clasificación, a que será unha viaxe longa e sobre o partido espero que sexa moi físico, contra un equipo que está en moi boa dinámica onde suman moitas xogadoras e conseguiron un xogo moi sólido”.
Cantero considera vital que Celta Zorka Recalvi “ten que buscar levar o ritmo de xogo, partindo desde a nosa defensa e crecer desde aí”. Cantero considera que “se somos capaces de controlar o rebote e levar o partido a un tenteo non moi alto teremos as nosas opcións. Serán os detalles e o acerto os que decanten o partido, como sucedeu no partido de casa” conclúe a adestradora viguesa.
DATOS DE INTERESE
DÍA E HORA: 22 de febreiro, ás 19.00 horas.
CAMPO: Polideportivo Urreta – Galdakao (Vizcaia)
ÁRBITROS: Gorka García Balzategui e Jaume Pujol Gimenez.
INCIDENCIAS: Partido correspondente a xornada 19 da Liga Feminina 2 de baloncesto no que enfrontará ao GDKO Ibaizabal e o Celta Zorka Recalvi no Polideportivo Urreta.
