A máxima categoría do fútbol feminino estatal, a Primera Iberdrola pasará a chamarse ‘Liga Ellas’ na vindeira tempada 2021-22. O cambio non só será de nomeclatura, segundo se explicou na presentación do novo nome, a pretensión é que a competición pase a ser profesional a todos os efectos. Algo que a día de hoxe, aínda non é pese a contar xa cun Convenio Colectivo que defende os dereitos das futbolistas que militan na elite estatal.
O anuncio desta novidade tivo lugar nunha reunión cos 18 presidentes de clubs que actualmente militan na Primera Iberdrola, no Centro de Alto Rendimiento (CAR) do Centro Superior de Deportes de Madrid. Alí estiveron representantes do Consejo Superior de Deportes (CSD) que será quen supervise nos tres primeiros anos a súa transformación en competición profesional xunto coa Real Federación Española de Fútbo (RFEF). Así, a transformación se levará a cabo de 2021 até 2024. Trátase, en definitiva, dun ‘Plan de Profesionalización da liga feminina de fútbol’.
Entre as autoridades presentes a presentación deste novo nome para a Primera Iberdrola, ‘Liga Ellas’, estivo a vicepresidenta primeira do Goberno, Carmen Calvo, e a presidenta saínte do CSD, Irene Lozano, tamén acudiron futbolistas como Carmen Menayo (Atlético) o Garazi Murua (Athletic).
Segundo ten transcendido, a Liga Ellas terá 16 clubs. Como activo principal á hora de comercializar esta competición estarán os dereitos audiovisuais, tal e como acontece noutras disciplinas deportivas. Actualmente a empresa Mediapro conta cos dereitos de moitos dos actuais clubs da categoría. Preténdese que sexa unha comercializadora independente a que xestione este activo. Así pois, queda pendente unha negociación neste ámbito.
Para Irene Lozano, presidenta do CSD, a ‘Liga Ellas’ será unha “inspiración para as nenas que xogan ao fútbol no patio do colexio”.
Carmen Calvo anuncia que se prepara unha nova Lei do Deporte
A vicepresidenta Carmen Calvo falou da nova Lei do Deporte que permitirá, dixo, “que as mulleres estén nas mesmas condicións que os homes en todas as disciplinas” deportivas. Apuntou que se está a “traballar a toda máquina nun proxecto de Ley do Deporte que porá negro sobre branco os dereitos e liberdades das mulleres neste país para estar en todas as disciplinas deportivas coas mesmas condicións de igualdade cos homes”.
A vicepresidenta primeira do Goberno de España, Carmen Calvo, sinalou: “Non pode haber unha sociedade que non traballe intensamente pola igualdade entre homes e mulleres. Haino que facer en moitas direccións e unha delas é o deporte”
Carmen Calvo reivindicou a “liberdade das mulleres para se dedicar ao deporte como profesión e para esixir ao seu país e ás súas institucións que o fagan posible nas mesmas condicións ca os varóns”. Asegurou que “non pode haber unha sociedade que non traballe intensamente pola igualdade entre homes e mulleres. Haino que facer en moitas direccións e unha delas é o deporte”.
Dirixíndose ás futbolistas presentes no acto, a vicepresidenta primeira do Gobierno, Carmen Calvo, agradeceulles o seu traballo xa que o fútbol “é un deporte tractor de todas as demais actividades deportivas onde as mulleres teñen dereito a estar, a dedicarse e a facer del a súa profesión”.
Os valores do deporte e o seu aporte para o empoderamento feminino
Salientou Carmen Calvo “a importancia dos valores do deporte ben entendido e ben practicado, que supón esforzo, disciplina, pundonor con unha mesma, nunha sociedade que, ás veces, non valora o esforzo e agarda que as cousas ocurran de xeito máxico”.
Tamén nesa liña, a vicepresidenta primeira do Goberno de España, Carmen Calvo, asegurou que o deporte non só “forma parte da cultura da vida e da saúde, senon tamén da chmada ‘relixión civil moderna’, sobre todo o fútbol”. Calvo destacou que este deporte é un “referente para as demais mulleres, e tamén é unha referencia moi importante para os homes que nos ven libres, poderosas e fortes, preparadas para lle plantar cara á vida”.
