Na fase final da Copa da Raíña haberá representación galega en diferentes roles sobre a pista. Como xogadoras, competirán as futbolistas do Pescados Rubén Burela e o Ourense Envialia, pero como árbitra estará Lidia Crespo, no que é o seu debut na competición copeira.
Con motivo da súa estrea no equipo arbitral nesta fase final, a Real Federación Galega de Fútbol (Futgal) falou coa colexiada, quen reflexionou sobre as súas sensacións previas á Copa e a importancia do evento. “É un orgullo e unha oportunidade de visibilizar o fútbol feminino. É un orgullo defender a camisola e levar a Galicia por diante. Vai ser algo moi visible, que é moi interesante para todo o deporte”, declarou Crespo.
A viguesa non contaba con estar presente nesta fase final da Copa da Raíña: “Foi unha sorpresa, non mo esperaba”, admite. Porén, non será a súa primeira experiencia nunha competición nacional de nivel. Lidia Crespo puido estar presente na Supercopa entre o Burela e o Poio Pescamar, pero como asistente en reserva. Durante ese torneo, “tiven a sorte de ver un gran torneo e como o prepararon. Foi unha experiencia moi bonita”, recorda.
A arbitraxe feminina con Lidia Crespo
Os inicios desta árbitra comezaron ligados ao fútbol, con cinco anos, competindo como a única futbolista, ata que chegou ao futsal, onde os equipos xa eran femininos. Máis adiante, o mundo do arbitraxe cruzouse no seu camiño, e cando tivo que tomar a decisión entre seguir como xogadora ou arbitrar, tívoo claro. Esta é xa a súa oitava tempada como colexiada.
Para as nenas que agora miran ás profesionais como espello, Crespo recórdalles que “non hai límites. Os poñemos nós e a sociedade, pero estamos para loitar contra eles”. A árbitra anímaas a participar e sinala que cada vez as mulleres no fútbol e na arbitraxe cada vez son máis.
O futsal galego é de alto nivel
Lidia Crespo asegura que o fútbol sala galego ten un alto nivel. Non hai máis que observar a Primeira División, con cinco equipos representando a Galicia, e outros en Segunda, loitando pola súa posición na máxima categoría.
“A cantidade de equipos galegos é moi grande, os árbitros de futsal apenas saímos da comunidade. Iso di moito das cousas que facemos desde abaixo”, engade Crespo.
Podes ver a entrevista ao completo dándolle ao play:
