Retorno ao triunfo na casa e retorno ao liderato en solitario. Esta foi unha xornada de reencontro con boas sensacións e cos froitos desexados do traballo feito para o Dépor ABANCA. As coruñesas venceron ao Athletic Club B en Abegondo por 2-1. O empate do CP Cacereño e a derrota da SD Eibar fixeron o resto en termos de clasificación colocando ás galegas no primeiro posto en solitario. O triunfo das coruñesas chegaría grazas aos goles de Ainhoa Marín e de Raquel García.
👥 #AsNosas
🆚 #DéporABANCAAthleticClubB
🏆 #PrimeraFederaciónFutFem
🗓️ 18ª xornada
🕘 17:00 h.
🏟 #Abegondo
📺 https://t.co/hhp02DGuC2
🎟 https://t.co/wzkJG7AqZw pic.twitter.com/KhghfNk3uq— RC Deportivo (@RCDeportivo) February 1, 2023
O primeiro cuarto de hora de xogo desenvolveuse cun claro dominio deportivista, pero sen que as pupilas de Irene Ferreras apenas pisasen a área rival. Soamente un zurdazo cruzado de Charle, no minuto 9, obrigou a intervir a Paula, a porteira visitante.
O primeiro achegamento das biscaíñas produciuse no minuto 19, cando Lucía saíu a despexar de puños unha falta lateral lanzada por Estefa e o rexeite rematouno Urzainqui a mans da porteira deportivista.
Ainhoa Marín e a súa verticalidade abriron o marcador
As deportivistas abriron o marcador no minuto 25. Foi despois dun balón longo para Ainhoa Marín, que gañou a carreira ao seu par, desbordouna cun chapeu, xa na área regateou a dous rivais máis cun recorte cara a fóra antes de superar á porteira cun dereitazo raso. Un gran gol da dianteira catalá, que xa suma 6 na presente campaña ligueira. A verticalidade coa que entende o fútbol esta deportista é enorme. Sempre mira cara á porta rival. Sempre cara adiante.
A partir dese instante, o filial branquivermello deu un paso adiante e atacou máis e mellor. O Athletic Club B forzou varios saques de esquina e xerou ocasións.
A segunda metade comezou desnivelada. O Dépor ABANCA sumou oportunidades pero non conseguía marcar. Inés, Sara Navarro ou Charle foron algunhas das futbolistas que gozaron de ocasións ante o marco rival. No fútbol, adoita acontecer que cando se perdoa moito chega a sorpresa do rival que anota e faite un sete. Así pasou cando no minuto 63 o Athletic Club B empataba o encontro nunha acción de auténtica mala sorte. Inés Altamira despexaba sobre a liña de gol un disparo de Irati que desviara Lucía. A mala fortuna fixo que o balón golpeou no brazo esquerdo da porteira deportivista para meterse na portería coruñesa cun tanto en propia porta da cancerbeira que poñía o 1-1 no marcador de Abegondo.
Meteu a directa o Dépor ABANCA e foi a polo partido con forza e determinación. Houbo ocasións de Raquel García, de Sara Navarro e de Paula Gutiérrez, por citar algunhas das máis salientables. Pero o gol non chegaría até o minuto 87 de partido. Foi nun saque desde o curruncho botado pola futbolista deportivista Paula Gutiérrez que cabecea Raquel García. A xogadora branquiazul gáñalle a posición no salto a Nere e envía o esférico ao fondo das mallas colocando ao Dépor ABANCA por diante (2-1).
Fiiiiinaaaaal do #DéporABANCAAthleticClubB, 2-1!
Retransmisión patrocinada por Auga de Parada pic.twitter.com/SvZqAIpzQa
— RC Deportivo (@RCDeportivo) February 1, 2023
Con este triunfo, as branquiazuis que adestra Irene Ferreras suman 25 dos 30 puntos postos en xogo no que vai de campaña en Abegondo, produto de 8 vitorias, 1 empate e 1 derrota. O Dépor ABANCA totaliza 37 puntos, que lle serven para seguir liderando a clasificación de Primera Federación FutFem trala disputa de 18 xornadas. Agora faio, ademais, en solitario, despois da derrota da SD Eibar ante o CDF Osasuna (0-1) e do empate do CP Cacereño en campo do RCD Espanyol (0-0).
FICHA TÉCNICA
2) RC DEPORTIVO ABANCA: Lucía, Cris, Inés Altamira, Raquel García, Monteagudo, Henar, Paula Gutiérrez, Ainhoa Marín (Patri López, min. 90+1), Eva Dios (Sara Navarro, min. 55), Charle (Carlota Sánchez, min. 89) e Millene (Carlota Suárez, min. 55).
1) ATHLETIC CLUB B: Paula, Zuriñe (Oiane San Martín, min. 62), Laida, Eider, Nere, Artero, Miranda, Iribarren (Irati, min. 62), Estefa (Mara, min, 89), Muniozguren (Lekue, min. 71) e Urzainqui (Malen Uranga, min. 62).
GOLES: 1-0 Ainhoa Marín (min. 25); 1-1 Lucía, en propia meta (min. 63); 2-1 Raquel García (min. 87).
ÁRBITRA: Andrea López Méndez (c. navarro). Cartón amarelo a Paula Gutiérrez (min. 49), Henar (min. 71) e Irati (min. 77).
INCIDENCIAS: partido correspondente á 18ª xornada de Primera Federación FutFem da RFEF disputado na Cidade Deportiva de Abegondo.
