O triunfo colleitado na Ciudad Deportivo do Granada CF a pasada fin de semana supuxo unha alegría por partida dobre. Primeiro polo feito de gañar fóra da casa, e segundo por que ese resultado devolvía ás galegas ao máis alto da Primera Federación. O Dépor ABANCA xa foi líder outras xornadas, pero esta, a 15ª, é significativa polo feito de que pon fin á primeira volta.
As Nosas deportivistas son campioas de inverno da Primera Federación. O equipo que adestra e Irene Ferreras non perdeu o paso da cabeza da táboa e volve a colocarse no máis alto tras o seu triunfo 0-1 ante o Granada CF. Unha vitoria pola mínima e un liderato por un punto. Pero no primeiro caso abonda para sumar tres puntos, e no segundo para rematar no máis alto a primeira volta.
Xa o pasado ano o Dépor ABANCA tiña sido campión de inverno. Logo, con Miguel Llorente como adestrador, o conxunto coruñés foi perdendo empaque na segunda volta. De feito, a tempada pasada As Nosas branquiazuis chegaban a este punto da competición con máis puntuos no peto que os 31 que agora mesmo suman. Así e todo, este bloque pinta ben. É un equipo que sabe crear, pero tamén é un equipo que sabe sufrir, adaptarse ás circunstancias de cada partido e semella forte como bloque.
Irene Ferreras, sen lanzar as campás a voar e sobre todo sen dar nada por feito, amósase como unha adestradora que confía en que o grupo de futbolistas que adestra pode alcanzar o obxectivo final: o ascenso á Primera División Femenina. Pero tamén ten claro que vai custar traballo, esforzo e non dar pasos en falso.
O líder da Primera Federación, ascende directamente
A Primera Federación está a ser unha categoría moi igualada, con equipos moi ben armados e no que calquera pode ganar a calquera. Por iso é tan importante non confiarse e manter a concentración ata garantir o obxectivo do ascenso.
Hai dous xeitos de facelo. O rápido é ser líderes tamén cando remate a segunda volta, ao final do campionato de liga. As campioas ascenden directamente.
O segundo camiño para regresar á Primera División Femenina do fútbol español require quedar ao final da liga regular dentro dos postos que van do segundo ao quinto da Primera Federación. Esos catro equipos xogarán un play-off de ascenso. O conxunto que resulte vencedor, obterá o segundo billete á elite.
Ata o de agora as galegas fixéronse fortes en Abegondo e construíron a súa fortaleza sobre esa base sólida. Fóra da casa, as coruñesas rañaron puntos en forma de triunfos e de empates que lles permitiron chegar ata onde agora mesmo están: no cumio da táboa.
O único equipo que foi quen de levar algo no peto da Cidade Deportiva de Abegondo foi o a SD Eibar que acadou un empate (1-1). Elas son as inmediatas perseguedoras das galegas. Teñen un punto menos.
Se o Dépor ABANCA suma nove vitorias, catro empates e dous derrotas, a SD Eibar ten oito triunfos, seis empates e unha derrota.
Cacereño, seguinte rival do Dépor ABANCA en Abegondo
Xusto por debaixo deles dous está o Cacereño, seguinte rival do Dépor ABANCA. O terceiro clasificado visita a Cidade Deportiva de Abegondo o vindeiro sábado 21 de xaneiro a partir das 12:00 horas.
As de Cáceres teñen 28 puntos, tres menos cas coruñesas. Como a SD Eibar, gañaron oito partidos, pero no seu caso perderon tres e remataron en táboas catro. Son o equipo menos goleado da categoría con 11 goles encaixados. Hai que dicir que o Dépor ABANCA só recibiu un máis ca elas (12) e as galegas, xunto co FC Barcelona B, son o equipo con maior olfato anotador. Suman xa 29 goles no seu haber.
Na última xornada da primeira volta, o Cacereño perdía pola mínima (2-1) co Dux Logroño. As seguintes rivais do Dépor ABANCA empezaron gañando pero as de Logroño remontaron un partido no que as de Cáceres estiveron moitos minutos xogando con 10.
Hoxe mesmo o Cacereño informaba de que Ilona Guede deixaba a súa disciplina e agradecía á fútbolista o seu traballo.
OFICIAL |
El Cacereño Femenino y Servette han llegado a un acuerdo para rescindir la cesión de Ilona Guede.
¡llona, te deseamos mucha suerte en lo personal y lo profesional!#GraciasIlona
⚽💚🤍⚽#PrimeraFederacionFutFem#CPCFem pic.twitter.com/mvLbDxLiNI
— Cacereño Femenino (@CacerenoFem) January 17, 2023
Ao mediodía do sábado 21, no fortín de Abegondo, o Dépor ABANCA volverá defender o liderato, un posto do que non quere apearse de aquí ao final da liga, aínda que será moi complicado e o importante é que o actual, o 1º, sea o seu posto dentro de 15 partidos e volva pola porta grande á elite do futfem estatal.
Ademais de transmitir o partido a través da canle de YouTube do RC Deportivo, a entidade branquiazul xa ten habilitada a opción para que a afección deportivista poida retirar as entradas para asistir ao partido en vivo na Cidade Deportiva de Abegondo. Como é habitual, ata que o aforamento se complete, os billetes despacharanse en liña sen ningún custo para as persoas socias do RC Deportivo. O trámite faise a través da páxina web bancada.rcdeportivo.es.
O RC Deportivo explica con máis detalle nesta información os trámites a seguir, e pide ás persoas que fagan a reserva do seu sitio na bancada de Abegondo que vaia ao partido, para evitar que se dea o caso de que queden afeccionados sen poder acudir ao partido e queden sitios sen ocupar.
Tamén explican desde a entidade deportivista que esta reserva de sitio para acudir a ver o partido de As Nosas e o Cacereño , fai que as persoas socias do RC Deportivo teñan prioridade para a retirada da súa entrada de balde, pero só até o xoves 18/1/23 ás 23:59 horas. Segundo indica o club herculino, “a partir dese momento, se houbese aforo aínda dispoñible, habilitarase simultaneamente o sistema de venda de entradas para o público en xeral, a través da mesma plataforma bancada.rcdeportivo.es. O prezo de cada entrada para seareiros sen carné do RC Deportivo é de 10 euros”.
