Todo listo para que o Telecable visite ao HC Deportivo Liceo no Pazo dos Deportes de Riazor mañá sábado 20 de novembro de 2021 a partir das 18:00 horas (Hockey Global). O club é un dos fortes da OK Liga e ademais é o ex equipo da patinadora coruñesa María Sanjurjo. A xogadora internacional está de volta na súa terra defendendo as cores vercibrancas. Para ela, abofé que será un partido especial.
O equipo segue a estar adestrado polo dúo que conforman Noemí Uzal, delegada, e Marc Godayol, preparador físico. O posto de Carlos Loureiro aínda non ten subtitución. Con esta parella interina no banco, o HC Deportivo Liceo recibe a outro xigante da máxima categoría do hoquei a patíns español, será o segundo nunha serie de catro duros encontros neste arranque de tempada 2021-22. A pasada semana as galegas caeron 3-1 ante o Martinelia CP Manlleu e na primeira xornada impuxéronse 5-1 ante o Bigues i Riells.
Tal e como apuntan desde o club, tropezo na pista do Martinelia CP Manlleu “non embaza o bo comezo das verdibrancas na OK Liga Feminina. Son tres puntos sobre seis posibles e unha carta de presentación realmente positiva, competindo de poder a poder contra rivais de entidade a pesar da súa condición de acabadas de ascender”.
A adestradora liceísta, Noemí Uzal, é plenamente consciente do potencial do conxunto asturiano: “É un dos top catro da Liga, sempre están arriba e pelexan por todo. Un equipo moi vertical, sempre están á procura da portaría, son fortes fisicamente, duras e con xogadoras de moito renome”.
Noemí Uzal, a ex porteira e adestradora das verdibrancas, fala do rival: “É un dos top da liga, sempre están arriba e pelexan por todo. Un equipo moi vertical, forte, duro e con xogadoras de moito renome”
Invictas e imbatidas, as xogadoras do Telecable HC están a fronte da clasificación. Dous partidos gañados de dous, nove goles a favor e a portaría a cero. Seis puntos no casilleiro avalan a súa condición de un dos favoritos desta tempada.
Así e todo, a técnica galega Noemí Uzal confía plenamente en poder irse con bo sabor de boca desta proba: “Debemos facer valer o factor pista. Xogar no Pazo é moi difícil e creo que podemos sacar cousas positivas. Sacarnos medos. Non hai rival grande nin cativo se xogas co que sabes e levas o partido ao teu terreo, pódese decantar dos dous lados. Tamén haberá que saber sufrir xa que haberá momentos difíciles de partido”.
Segundo explica a ex cancerbeira liceísta e agora adestradora: “Quen cometa menos erros, e dea menos contras ao rival, estará aí”. Noemí Uzal anticipa que o HC Deportivo Liceo estará “no partido ata o final” e prognostica que o cruce co Telecable “será un partido que a afección gozará por sermos dous equipos moi alegres que buscamos portaría”.
O HC Deportivo Liceo buscará dar un golpe na mesa coas seguintes convocadas: Viki Caretta, Katy Guscin, Luchy Paz, Adriana Soto, María Sanjurjo, Alba Garrote, Naiara Vaamonde, Lucía Yáñez, Lara Yáñez e Cris Diz.
As asturianas do Telecable HC teñen previsto viaxar por estrada o mesmo sábado coa baixa da súa porteira, a internacional chilena Fernanda Hidalgo. A cancerbeira ten precisamente compromisos coa súa Selección. Polo mesmo motivo o HC Deportivo Liceo non poderá contar con Bea Gaete.
Segundo informan desde o Telecable HC “o equipo está ben, adestrando a gusto, con confianza e boas sensacións tras o inicio ligueiro, pero conscientes de que o Liceo que se atoparán en Riazor non será o equipo que se atoparon na súa anterior andaina pola OK Liga, polo que deben de prepararse mentalmente para o choque, conscientes de que o Telecable HC é un equipo que está capacitado para gañar en calquera pista”.
Como ver o partido do Liceo en vivo no Pazo dos Deportes?
Desde a entidade herculina chaman á afección ao hoquei a acudir ao partido. Lembra que én “un partido de alta dificultade sempre require o maior apoio posible. Liceístas, esperámosvos no Palacio dos Deportes!”, alentan ás seareiras e seareiros do conxunto verdibranco.
Acudir a Riazor a animar ao equipo é máis sinxelo que nunca. Como vén sendo habitual, hai tres escenarios diferentes que se proceden a explicar. Primeiramente, haberá 500 pases gratuítos dispoñibles para os abonados do Real Club Deportivo. Non existirá máis custo que o tempo dedicado á xestión, que se realizará mediante a seguinte ligazón de Cluber: https://bit.ly/3qCtcRI.
“As persoas que apliquen esta posibilidade terán a obrigación de presentar dous documentos nos arredores do Palacio: o código QR proporcionado por Cluber e o carné do Real Club Deportivo. Serán indispensables para acceder”, segundo informa o club liceísta.
O segundo escenario aplicarase aos socios do HC Deportivo Liceo, que deberán mostrar o código QR do seu carné dixital no momento da entrada. Será a medida habitual mentres se xestionen os pases físicos. Por tanto, non fará falta maior xestión.
Por outra banda, o público xeral que desexe asistir ao encontro conta con entradas dispoñibles ao prezo de 5€ cada unha. Adquiriranse en liña nesta ligazón de Cluber: https://bit.ly/3wQSpJ0
