Deberes feitos para as festas de Nadal no HC Deportivo Liceo. O conxunto liceísta sumou unha nova vitoria na OK Liga Feminina nesta oitava xornada tras superar ó CP Vilanova. Deste xeito, o conxunto que adestra Stanis García acumula xa dez puntos no seu casilleiro. Esta vitoria permítelle continuar na zona cómoda da clasificación na oitava praza.
O adestrador, Stanis García, predixo na previa un guión de partido que adiviñou punto por punto. As liceístas, vestidas nesta ocasión coa indumentaria negra e non a verdibranca, tomaron a iniciativa do ataque mentres as catalás agardaban algún atisbo de transición. O pouco acerto inicial do equipo coruñés (María Sanjurjo errou un penalti ós nove minutos) non durou demasiado. Tras unha gran xogada de María Sanjurjo, Adriana Soto definiu para o 1-0. Alba Garrote erraría tamén desde o punto de penalti o seu duelo ante Julia Baldrich.
Os escasos achegamentos do CP Vilanova, pola súa parte, atoparon unha barreira en forma de porteira. Unha vez máis Viki Caretta foi un seguro baixo paus para as coruñesas. A gardameta detivo as dúas máis claras das visitantes: un penalti de Blanca Angrill e un man a man de Paola Pascual.
Adriana Soto, a goleadora
A pesar da superioridade, o HC Deportivo Liceo necesitou poñer o mono de traballo. Todo continuou igual na segunda metade do encontro, aínda que o tanto chegou do lado rival. Fíxoo Paola Pascual tras superar a Viki Caretta cun golpeo espectacular (1-1).
O gol serviu de aviso e espoleou aínda máis ás xogadoras que prepara Stanis García, que volveron poñerse por diante dous minutos despois coa segunda diana de Adriana Soto, letal tras atopar unha bóla morta na área.
A falta de dez minutos, a que apareceu foi Naiara Vaamonde. O 3-1 leva a súa sinatura. Xurde froito dunha xogada moi similar á anterior.
O dominio ofensivo, o 4-1 de Adriana Soto, acadado nunha falta directa, e as paradas na portaría de Viki Caretta serviron para sumar un importante triunfo do HC Deportivo Liceo diante do CP Vilanova antes do parón da competición polas festas de Nadal.
A arxentina Adriana Soto suma na súa conta particular xa 11 goles o que a coloca quinta na lista de goleadoras da OK Liga, so un gol por debaixo de Gemma Solé, do Cerdanyola, e de Aina Florenza do Generali HC Palau de Plegamans. María Díez do Manlleu é segunda con 13 dianas e encabeza a táboa de goleadoras Victoria Porta do Vila-Sana.
O equipo coruñés regresará a competición a segunda fin de semana de 2022. O seu rival será o CP Voltregá Stern Motor que ven de empatar co CP Las Rozas (1-1). As catalás teñen so catro puntos, froito dun triunfo (1-0 co Orkla Bigues I Riells, e este empate colleitado na oitava xornada. O CP Voltregá Stern Motor remata o ano ocupando a posición undécima na táboa clasificatoria.
FICHA TÉCNICA
4) HC DEPORTIVO LICEO: Viki Caretta; Bea Gaete, María Sanjurjo, Alba Garrote e Adriana Soto – quinteto inicial-. Tamén xogaron: Ale Martín, Naiara Vaamonde, Lara Yáñez e Lucía Yáñez.
1) VILANOVA: Julia Baldrich; Marina Asensi, María Córdoba, Laura Manzanares e Paola Pascual – quinteto inicial-. Tamén xogaron: Blanca Angrill, Regina Giménez e Aina Martínez.
GOLES: 1-0 (Adriana Soto, min. 11). 1-1 (Paola Pascual, min. 29). 2-1 (Adriana Soto, min. 31). 3-1 (Naiara Vaamonde, min. 40). 4-1 (Adriana Soto, min. 47).
ÁRBITRO: Juan Iglesias Vallina, principal, Íñigo López-Leitón Zapico, auxiliar, Carlos Chouciño Fernández, cronometrador. Amosou cartón azul á patinadora local Alba Garrote.
INCIDENCIAS: Xornada oitava da OK Liga Feminina tempada 2021 – 2022. Partido disputado no Pazo dos Deportes da Coruña.
