O cambio de pista supuxo tamén un cambio de rumbo para o HC Deportivo Liceo que recuperou o camiño do triunfo e gañou ao PHC Sant Cugat 3-1. Abriu o marcador a goleadora Adriana Soto e sumou unha dupla de tantos a coruñesa María Sanjurjo.
A semana de tres partidos comezou con dúas derrotas, pero remata cun triunfo. O HC Deportivo Liceo que adestra Stanis García sumou de tres contra o PHC Sant Cugat, visitante esta vez do Agra I, para reunir un total de trece puntos e coller aire na clasificación da OK Liga Feminina.
As xogadoras liceístas conseguírono a base de paciencia e esforzo. A primeira metade non trouxo goles para ningún dos dous equipos, pero si un guión intenso e cargado de faltas. Nunha directa estivo a piques de marcar Adriana Soto, a goleadora do equipo, aínda que a meta Candal aguantou ben a definición.
A arxentina redimiuse ó regresar á pista. Seu foi o tanto de penalti que supuxo o 1-0, un resultado máis acorde á necesidade do equipo. Non foi, sen embargo, a única bóla parada do segundo acto. Viki Caretta, con outra boa actuación, neutralizou dúas directas de Alba Ambròs e Laura Porta.
Empata o Sant Cugat e remonta do Liceo
O minuto 44 foi chave. O PHC Sant Cugat logrou nivelar o marcador mediante Laia Paredes, pero inmediatamente despois María Sanjurjo recuperou a vantaxe. O golpe foi un visto e non visto. Ela mesma pechou o partido co 3-1 definitivo.
FICHA TÉCNICA
3) HC DEPORTIVO LICEO: Viki Caretta; María Sanjurjo, Bea Gaete, Alba Garrote e Adriana Soto – quinteto inicial -. Tamén xogaron: Ale Martín, Naiara Vaamonde, Luchy Paz e Lucía Yáñez.
1) SANT CUGAT: Irache Candal; Laura Porta, Txell Gimeno, Alba Ambròs e Dana Antón – quinteto inicial -. Tamén xogaron: Aida Antón, Andrea Massons, María Just e Laia Paredes.
GOLES: 1-0 min 28 Adriana Soto, de penalti 1-1 min. 44 Laia Paredes. 2-1 min. 44 María Sanjurjo. 3-1 min. 49 María Sanjurjo.
ÁRBITRO: Daniel Villar Costa. Mostrou cartón azul á xogadora liceísta Adriana Soto.
INCIDENCIAS: Xornada 10 da OK Liga Feminina 2021/22, adiada no seu día por motivos sanitarios. Pavillón Agra I (A Coruña).
