O domingo na tarde, ás 17:00 horas, rematarán os compromisos deportivos do HC Deportivo Liceo nunha semana intensa e, ata o de agora, exitosa. Reciben as liceístas ao Cerdanyola CH Feníe Energía. Para a cita o técnico, Stanis García, non poderá contar coa internacional chilena Bea Gaete que ven de ser operada esta semana dun problema muscular nos tibiais. Tal e como comunicaba o club herculino, a deportista evoluciona favorablemente logo da intervención.
BEA GAETE foi operada hoxe dunha dolencia nos tibiais e xa evoluciona de xeito favorable.
Grazas a @ArriazayAsociad pola súa gran labor! pic.twitter.com/CDNtA4BzQs
— Hockey Club Liceo Feminino (@HCLiceoFem) March 10, 2022
Logo de vencer ao Martinelia CP Manlleu (1-0) e ao Telecable HC de Gijón (2-4), dous cocos da categoría, o HC Deportivo Liceo recibe como local a outro equipo que está por encima delas na táboa. O Cerdanyola CH Feníe Energía é quinto con 31 puntos, mentres as galegas son sétimas con 25.
O rival das galegas leva dúas semanas de parón e o último resultado levoulles a medirse ao Generali HC Palau de Plegamans caendo derrotadas por un condundente 7-1. Perderon aí o paso coa cabeza da táboa, pese a que continúen en postos altos. Chegarán á Coruña descansadas, se cadra con falta de ritmo de xogo polo parón pero desde logo, con ganas de reencontrarse con triunfo. Nas filas verdibrancas o anhelo será seguir coa serie de bos resultados e continuar sumando de tres. A cita, no pazo de Riazor, o domingo 13 ás 17:00 horas.
