Rosalía Muíño González Lía (A Coruña, 13 de febreiro de 2000), regresa á súa cidade natal para reincorporarse á disciplina do Dépor ABANCA unha vez concluída a tempada nos Estados Unidos, onde estuda e xoga para o South Florida Bulls, segundo informa a entidade branquiazul.
A deportista herculina arrincara xa esta tempada ás ordes do adestrador coruñés Manu Sánchez defendendo a elástica branquiazul antes de regresar a terras norteamericanas en xaneiro e continuar alí os seus estudos e a súa participación na competición norteamericana de soccer.
Até ese momento disputara 11 partidos, dous deles como titular, para sumar un total de 307 minutos e manterse ademais entre as xogadoras que máis veces vestiron a camiseta branquiazul: Gaby (112), Cris (110), Iris (102), Peke (101), Teresa Abelleira (92), Lía (83), Nuria (76), Kika (76), Alba Merino (71) e Michelle Romero (70).
A futbolista coruñesa, que regresou a Galicia nos últimos días e xa puido ver en directo na Cidade deportiva de Abegondo o partido do Dépor ABANCA contra o RCD Espanyol, no que as galegas remontaron un 0-1 até o 2-1 final.
Estaba previsto que Rosalía Muíño González, se unise ao traballo coas súas compañeiras na sesión de mañá de hoxe luns, 17 de maio.
Lía, estivo no Dépor ABANCA desde o arranque
Trátase dunha futbolista galega formada na canteira do Victoria CF. Lía foi unha das compoñentes do primeiro equipo do Dépor ABANCA cando se creou ao comezo da tempada 2016-2017. A centrocampista completou tres tempadas no conxunto herculino antes da súa marcha a EE.UU., nas que foi unha das futbolistas máis utilizadas por Manu Sánchez, xa que disputou 72 partidos, nos que marcou 13 goles. Ademais, a xogadora coruñesa formou parte do equipo que logrou o histórico ascenso a Primeira Iberdrola ante o CD Femarguín, o 19 de maio de 2019.
