O secretario xeral para o Deporte, José Ramón Lete Lasa, asistiu á presentación da Coupe de la Jeunesse, un dos eventos de remo de maior relevancia e prestixio para menores de 18 anos do panorama internacional. A competición celebrarase os vindeiros 5, 6 e 7 de agosto nas instalacións do Club Náutico de Castrelo de Miño, na provincia de Ourense.
Nas súas verbas o mandatario galego enviou unha mensaxe de apoio, e amosou a súa preocupación por todas as familias que estes días están a sufrir os efectos dos lumes en toda Galicia, e máis concretamente no concello de Castrelo de Miño: “a auga é deporte e desfrute, pero tamén é vida, e dela dependen a de moitos veciños de Castrelo”.
José Ramón Lete Lasa destacou a importancia de traer un evento deste calibre por primeira vez a Galicia, en concreto a Castrelo de Miño, posto que outorga prestixio á comunidade e fai que neste novo ciclo olímpico, multitude de deportistas de todo o mundo recorran ás nosas instalacións para o seu adestramento.
Tamén agradeceu a aposta firme da Federación Española de Remo por Castrelo de Miño, unha das tres pistas olímpicas de remo e piragüismo de todo o país, e destacou o compromiso que a Xunta de Galicia ven tendo dende hai anos polos deportes náuticos, suliñando que tras o atletismo, o remo, a vela e o piragüismo sexas os deportes con maior representación olímpica galega.
A competición que acollerá o Club Náutico de Castrelo de Miño estará composta por 120 embarcacións e preto de 500 deportistas de 16 equipos, cada un correspondente a un país, que a través da suma de puntos nas distintas probas das distintas modalidades deberán conseguir colocar ó seu país no máis alto da clasificación ao remate da última xornada para facerse co título de campións.
