O secretario xeral para o Deporte da Xunta de Galicia, José Ramón Lete Lasa, acompañado do delegado da Xunta en Pontevedra, Luis López, asistiron ao primeiro control selectivo da Real Federación Española de Piragüismo que valeu para asignar a praza olímpica no K1 200 metros feminino que acadou Teri Portela. Con este resultado, a padexeira galega converténdose na española con maior número de participacións olímpicas, un total de seis, desde Sidney 2000 ata Toquio 2020.
Lete Lasa asegurou que hoxe é “un día histórico para Galicia” xa que Teresa Portela vén de acadar unha “proeza só alcanzable para mulleres excepcionais como ela”. Segundo as verbas do secretario xeral, “Teresa Portela vén de escribir unha das páxinas máis brillantes da historia do deporte español”.
“Un fito histórico nunha instalación icónica”, dixo, como o encoro de Pontillón do Castro en Verducido, que leva o nome do olímpico español máis laureado de todos os tempos, o tamén galego, David Cal. “A Xunta apostou desde o primeiro momento por esta instalación e polo piragüismo e á vista están os resultados”, sentenciou o secretario xerla para o Deporte, Lete Lasa.
Tere Portela estará nos seus sextos xogos olímpicos competindo na disciplina de K1 200 unha modalidade de competición de velocidade, das chamadas explosivas (moito esforzo en pouco tempo) que se resolve en menos dun minuto, aproximadamente 45 segundos.
