- Tras a edición de 2020 da Semana ABANCA, que o secretario xeral, Lete Lasa, valorou como “unha mostra do traballo en equipo e da correcta aplicación do protocolo FISICOVID”, serán 2.500 os deportistas que se darán cita ao longo das cinco sedes de Vigo, Marín, Sada, A Coruña e Cortegada nas que terán lugar un total de catorce actividades
O secretario xeral para o Deporte, José Ramón Lete Lasa, participou nas instalacións da ETEA da presentación dunha nova edición da Semana Abanca que bota a andar o domingo 5 de setembro ata o 28 de novembro.
Na súa intervención, o mandatario galego destacou a importancia da auga para Galicia, tanto polos “dez mil ríos dos que falaba Cunqueiro como polos 1.629 quilómetros de costa que compoñen o noso litoral”.
Neste sentido apuntou a relevancia dos deportes náuticos, como o piragüismo, o remo e a vela que xuntan a un total de 46 deportistas olímpicos de Galicia, o 36% de todos os olímpicos galegos da historia. Estes tres deportes protagonizan, xunto ao esquí náutico, a Semana Abanca, que o secretario xeral describiu como “o mellor evento náutico nacional e o máis galego que existe”.
Ademais destacou as xestas dos olímpicos galegos en Toquio como as medallas de Nico Rodríguez (vela), Teresa Portela, Carlos Arévalo e Rodrigo Germade (piragüismo), ou os diplomas do propio Carlos Arévalo e Antía Jácome (piragüismo), Caetano Horta (remo), Támara Echegoyen e Iago López Marra (vela) en deportes náuticos. E como non, o gran papel que están a facer os paralímpicos galegos coas medallas de ouro e de prata para Susana Rodríguez Gacio e Gustavo Rodriguez (tríatlon), os diplomas de Chano Rodríguez e Jacobo Garrido (natación) e a clasificación para as semifinais de Adrián Mosquera (piragüismo), tamén en deportes acuáticos.
Tras a edición de 2020 da Semana Abanca, que o secretario xeral valorou como “ unha mostra do traballo en equipo e da correcta aplicación do protocolo marco FISICOVID- DXTGALEGO para salvagardar a actividade deportiva galega”, nesta ocasión serán 2.500 os deportistas de vela, piraguismo, remo e esqui nautico que se darán cita ao longo das cinco sedes de Vigo, Marín, Sada, A Coruña e Cortegada nas que terán lugar as catorce actividades.
Actividades da Semana Abanca:
- Internacional de Kayak de mar Concello de Vigo (5 de setembro)
- Copa Galicia de Bateis Concello de Marín – GP ENCE (11 de setembro)
- Trofeo Ence escolar de Remo ergómetro (16 de setembro)
- Campionato Ibérico Concello de Vigo ILCA (18 de setembro)
- Trofeo Vila de Bouzas Concello de Vigo de cruceiros (25 de setembro)
- Regata Divino Rei de cruceiros (2 e 3 de outubro)
- Copa Ibérica de esquí náutico – GP Xunta de Galicia (o 9 de outubro)
- Regata Isabel Zendal feminina J80 (23 e 24 de outubro)
- Liga española de Remomar Copa Ibérica de Remomar – GP Deputación da Coruña (do 12 ao 14 de outubro)
- Gala do Remo Galego (do 12 ao 14 de outubro)
- Congreso español de Remomar (do 12 ao 14 de outubro)
- Gala do Piragüismo Galego (20 de novembro)
- Regata Aurelio Fernández Lage de Optimist – Cidade da Coruña (27 e 28 de novembro).
