O secretario xeral para o Deporte, José Ramón Lete Lasa, acompañado polo delegado territorial da Xunta en Pontevedra, Agustín Reguera, recibiu no estadio de fútbol do Centro Príncipe Felipe de Pontevedra á futbolista galega Teresa Abelleira que vén de proclamarse campioa do Mundo de fútbol coa selección española feminina en Australia e Nova Zelandia.
Nas súas verbas, Lete Lasa destacou “a evolución do fútbol feminino nos últimos anos ata chegar ao cumio máis alto coa primeira galega campioa do Mundo”. Con motivo desta recepción, o secretario xeral para o Deporte, entregou a Teresa Abelleira unha placa conmemorativa en nome da Xunta de Galicia.
Neste sentido, o mandatario galego destacou a outras grandes futbolistas galegas como Mari Paz Vilas, que foi quen de marcar nun partido coa Selección Española ata sete goles e é a máxima goleadora histórica do Valencia; Vero Boquete, a primeira muller española en gañar a Champions League e que lle dá nome ao estadio de Santiago; ou Nuria Rábano, vixente campioa da Champions League co FC Barcelona.
Para Lete Lasa, todos os esforzos e sacrificios que teñen feito as mulleres futbolistas para acadar unha maior igualdade, adquiren, grazas á medalla de Teresa Abelleira, maior sentido e amósanos que moitos ámbitos da sociedade están a cambiar.
Neste sentido, Lete Lasa lembrou a figura de Irene González, galardoada coa distinción ao mérito deportivo da Xunta de Galicia o pasado mes de outubro a titulo póstumo que, hai cen anos, converteuse na primeira xogadora de fútbol de España.
Lete Lasa destacou a Teresa Abelleira non só como campioa mundial, senón tamén como a mellor xogadora de todo o campionato segundo a estatística dos seus pases e minutos xogados. Hoxe, dixo, “Tere recolle o legado de tantas mulleres que iniciaron o camiño para motivar e animar a facer deporte a tantos nenos e nenas de Galicia que queren seguir os seus pasos”.
