- Lete Lasa amosa o seu convencemento de que “Pontevedra volverá ser o epicentro mundial do triatlón cun éxito organizativo e deportivo no que agardamos que brillen galegos como Antonio Serrat, Sara Guerrero, Natalia Castro ou Esteban Basanta”
O secretario xeral para o Deporte, José Ramón Lete Lasa, participou no izado da bandeira da World Triathlon en conmemoración dos 200 días que restan para a celebración das final das Series Mundiais de triatlón, o 23 e o 24 de setembro en Pontevedra. O mandatario galego aproveitou este momento para reivindicar a Galicia e a Pontevedra como “unha das mecas do tríatlon mundial” tanto pola calidade dos deportistas galegos como polas probas que se organizan en Galicia.
Conta atrás para a final das series mundiais de triatlón con Pontevedra como escenario
Neste sentido, Lete Lasa gabou aos tres triatletas galegos que participaron nuns Xogos Olímpicos, como foron Iván Raña, “pioneiro e revolucinario”; Pilar Hidalgo, “a primeira triatleta referente para moitas que viñeron despois”; e Javier Gómez Noya, “probablemente, o mellor triatleta de todos os tempos”.
Lete Lasa tamén nomeou nesta lista a Fernando Alarza, galego de adopción e a Susana Rodríguez Gacio, unha das mellores paratriatletas do mundo que vén de acadar a medalla de ouro nos Xogos Paralímpicos de Toquío.
Respecto as competicións de triatlón celebradas en Galicia, Lete Lasa lembrou a gran final do mundial de tríatlon de longa distancia ITU Multisport celebrado en Pontevedra en 2019 coa vitoria de Gómez Noya e o subcampionato de Pablo Dapena; así como a Copa do Mundo disputada o ano pasado tamén en Pontevedra e que rematou cunha prata para Antonio Serrat ou a Copa de Europa de 2010 que gañou asemade Gómez Noya.
Con estes precedentes, dixo o secretario xeral, “estamos convencidos de que dentro de 200 días, Pontevedra volverá ser o epicentro mundial do tríatlon cun éxito organizativo e deportivo no que agardamos que brillen galegos como Antonio Serrat, Sara Guerrero, Natalia Castro ou Esteban Basanta”.
Pontevedra inicia a conta atrás para Gran Final das Series Mundiais de triatlón
