- O Junior Qualifying Series 1.000 Gadis Junior Prol Ferrol que se celebra ata o 25 de xullo na praia de Doniños é a segunda proba do circuíto júnior da World Surf League, considerado o mellor do mundo.
- Hai 32 mozas galegas apuntadas nesta competición dun total de 78 mulleres e 214 inscricións de surfers.
O secretario xeral para o Deporte, José Ramón Lete Lasa, participou na presentación do Junior Qualifying Series 1.000 Gadis Junior Prol Ferrol que se celebra do 22 ao 25 de xullo na praia de Doniños.
Nas súas verbas, o mandatario galego destacou a importancia de que Galicia “conte cunha das cinco probas do circuíto júnior máis importante do mundo, un feito que afianzará a política deportiva de base que se leva a cabo en Galicia”.
“Se Galicia xa conta cun dos mellores eventos de surf do mundo, como é o Pantin Classic Galicia Pro, dende agora conta co mellor evento de surf júnior”, dixo. Isto débese, apuntou o secretario xeral, a que Galicia conta coas mellores praias e unhas condicións que as converten nunha máquina inesgotable de fabricar ondas.
Hai 78 mulleres inscritas nesta proba de surf
En total, 214 persoas inscritas (78 mulleres e 136 homes) de 13 países dos 5 continentes vense as caras en Doniños para alcanzar o banzo máis alto do podio desta segunda entrega do circuíto júnior da World Surf League. Deles, 64 galegos (32 mozos e 32 mozas) competirán entre os mellores do mundo o que pon de manifesto “o asombroso nivel do surf galego, campión de España por equipos nos dous últimos anos”.
Lete Lasa insistiu na importancia deste campionato júnior para o este deporte en Galicia, tras a incorporación deste deporte ao programa olímpico que comeza nestes días en Toquio. De seguro, dixo, que moitos dos deportistas que hoxe compiten en Doniños poderán estar en París, en Los Ángeles ou en Brisbane nas próximas edicións olímpicas.
