- José Ramón Lete Lasa destaca no Parlamento Galego a “receita do deporte galego: sacrificio, colaboración e responsabilidade” para acadar só un 0,2% de brotes nos equipos autonómicos.
- O secretario Xeral para o Deporte da Xunta de Galicia asegura que no camiño da “recuperación non imos esquecer a ninguén” e fala da inclusión dos ximnasios na segunda fase do Plan de Rescate
- O orzamento da Secretaría Xeral para o Deporte se incrementa un 28,5%.
O secretario xeral para o Deporte, José Ramón Lete Lasa, compareceu esta semana no Parlamento de Galicia para dar conta das medidas adoptada no ámbito da práctica de actividade física e deportiva federada na Comunidade Autónoma e do estado de situación dela.
Tras gabar os últimos resultados acadados por deportistas galegas como Ana Peleteiro ou Belén Toimil e destacar a importancia do papel da muller no deporte galego, o secretario xeral destacou os tres grandes valores nos que todo o tecido deportivo e a Secretaría Xeral basearon o seu traballo ao longo do que levamos de pandemia pola COVID-19: sacrificio, colaboración e responsabilidade.
Sacrificio
Ao respecto do sacrificio Lete Lasa apuntou á cantidade de horas de traballo dedicadas. O secretario xeral destacou, por exemplo, os máis de 70 protocolos aprobados pola Xunta de Galicia a tenor do FISICOVID-DXT GALEGO (recollido por dúas revistas de impacto de referencia nacional e internacional), as cinco guías ‘Volvendo con sentidiño’ ou a “análise pormenorizado de seguimento e control que cada fin de semana realizamos sobre os partidos de ámbito estatal non profesional, que desde outubro xa se contan por máis de 600”.
Colaboración ante a COVID-19
Tocante á colaboración, ademais das decenas de videconferencias e xuntanzas con todo o sector, José Ramón Lete Lasa destacou o Foro de Reactivación do Deporte Galego, o traballo co Instituto Galego de Estatística (IGE) para ser a primeira comunidade cunha conta satélite do deporte ou o Clúster da Industria do Deporte e do Benestar de Galicia que foi presentado esta mesma semana.
Responsabilidade
No caso da responsabilidade, ademais do “sentido do deber co que a Xunta de Galicia foi adoptando as medidas necesarias para xestionar mellor a pandemia”, o secretario xeral subliñou a “gran capacidade de adaptación e a presteza coa que os nosos clubs e deportistas foron acollendo estas novidades normativas”.
O secretario xeral salientou que, despois dun ano enteiro traballando para conter a crise sanitaria no deporte, “recollemos os resultados”.
Neste sentido, o estudo do INIBIC–SERGAS reflicte realizado en colaboración coa Secretaría Xeral para o Deporte e que abarca a máis de 180.000 licenzas deportivas (85.000 delas entre 4 e 17 anos) revela que a incidencia da COVID-19 é inferior no deporte federado nos mesmos rangos de idade e en ambos sexos que na poboación xeral. De feito, os brotes detectados apenas afectan ao 0,2% dos equipos galegos.
Un estudo do SERGAS afirma que hai menos COVID no deporte federado que na poboación en xeral
Ademais, os mellores datos epidemiolóxicos que presenta Galicia permiten que en materia deportiva, “a nosa situación sexa mellor que a doutras comunidades que manteñen os ximnasios pechados ou que non permiten a asistencia de público aos espectáculos deportivos, así como algunhas instalacións municipais que continúan pechadas, a pesar da aprobación da Xunta”.
Lete Lasa: “Non imos esquecer a ninguén no camiño de recuperación”
O responsable do Deporte galego, José Ramón Lete Lasa, mirou ao futuro con optimismo e destacou que “neste camiño de recuperación non imos esquecer a ninguén”.
Neste o secretario Xeral do Deporte da Xunta de Galicai sentido falou do Plan de Rescate para autónomos e microempresas que na súa segunda edición conta cunha vía de acción de 15 millóns de euros para hostalería e outros negocios pechados como os ximnasios.
Do mesmo xeito, tamén destacou a subida do 28,5% do orzamento da Secretaría Xeral para o Deporte que chega aos 32,5 millóns de euros. Grazas a este aumento, os 58 convenios coas federacións deportivas galegas (xa sufragados ao 36%) e a partida de adquisición de equipamentos manteñen o importe de 2020, mentres que a convocatoria a clubs e entidades duplícase cunha liña específica para gastos orixinados pola pandemia.
Asemade, o secretario xeral destacou a boa situación financeira das federacións deportivas que segundo o estudo realizado sobre os seus custos e ingresos, “contan con orzamentos notables para desenvolver as funcións que teñen designadas pola Lei do Deporte”, de tal xeito que en 2020 tan só 5 federacións deportivas pecharon o exercicio con resultado negativo.
Como novidades destacou a recente creación da Federación Galega de Deportes Autóctonos, constituída polas modalidades de chave e billarda, así como o recoñecemento do break dance como modalidade deportiva e a creación da Liga Galega de Break, como paso previo á constitución da Federación Galega de Baile Deportivo.
Petición de redución do I.V.E. para servizos deportivos
Lete Lasa incidiu unha vez máis na importancia da colaboración e agradeceu o traballo da cámara galega que vén de rexistrar unha nova PNL para dirixirse ao Goberno de España e urxir medidas de axuda e financiamento destinadas ao tecido deportivo non profesional de ámbito estatal, así como para reducir o tipo do Imposto sobre o Valor Engadido (I.V.E.) do 21% ao 10% en todas as prestacións de servizos deportivos e de actividade física prestados.
