O secretario xeral para o Deporte, José Ramón Lete Lasa, vén de presidir unha nova xuntanza do Foro de Reactivación do Deporte Galego como espazo de deliberación, análise e proposta de actuacións para o sector deportivo de Galicia no contexto posterior á crise sanitaria do COVID-19.
O mandatario galego destacou o carácter estratéxico do deporte como demostra o ‘Termómetro do ecosistema do deporte en España’ que asegura que en 2018 o deporte supuxo un 3,3% do Produto Interior Bruto en España, xerando uns 40.000 millóns de euros e, ademais, o 2,1% do emprego estivo vencellado á actividade deportiva.
Nese sentido, José Ramón Lete Lasa lembrou como “o deporte galego recuperouse paulatinamente dos golpes que a pandemia provocou na súa actividade e o fixo grazas ao traballo, aos protocolos, ás guías e a unha responsabilidade da que todo o tecido deportivo galego débese sentir orgulloso”. “Hoxe seguimos na pelexa polo que o papel deste foro é capital”, engadiu.
O SX para o Deporte, José Ramón Lete Lasa lembrou que: “o deporte galego recuperouse paulatinamente dos golpes que a pandemia provocou na súa actividade e o fixo grazas ao traballo, aos protocolos, ás guías e a unha responsabilidade da que todo o tecido deportivo galego débese sentir orgulloso”
Na xuntanza virtual do Foro de Reactivación do Deporte Galego tamén estiveron representadas institucións como a Asociación de Empresas Xestoras de Instalacións Deportivas de Galicia (AXIDEGA), a Asociación Profesional de Educadores Físicos, o Instituto Galego de Estatística e a Universidade de Vigo ademais de empresarios e patrocinadores do deporte (Jim Sports e Recalvi).
Un dos puntos tratados con maior atención foi a creación das contas satélites polo Instituto Galego de Estatística para avaliar o impacto económico do deporte en Galicia, unha ferramenta coa que a comunidade galega será pioneira neste ámbito.
Constitución do Clúster da Industria do Deporte
Ademais, informouse da constitución do Clúster da Industria do Deporte que xa foi remitido ao Rexistro de Asociacións da Xunta de Galicia.
Baixo o paraugas do clúster, as empresas asociaranse para proporcionar recursos, capacidades, competencias, medios, formación e asesoramento ao amplo sector relacionado co ámbito deportivo.
Do mesmo xeito tamén se estudaron posibles propostas fiscais para o deporte, o recoñecemento da actividade física e o deporte como actividade esencial, a implantación de medidas para axudar á cidadanía a volver á practica físico-deportiva e evitar o sedentarismo, a revisión dos requisitos e as dificultades para abrir negocios en cada concello ou a dixitalización do deporte para simplificar a burocratización no sector.
Lete Lasa: “A coordinación é fundamental”
O obxectivo do Foro de Reactivación do Deporte Galego é a análise das medidas de actuación que, desde os distintos ámbitos materiais afectados, poidan formularse para establecer un marco de recuperación sostible do sector deportivo galego.
Neste foro de deliberación, análise e proposta fomentarase a participación de todo o tecido deportivo galego, porque en palabras de José Ramón Lete Lasa, “a coordinación cos axentes e o tecido deportivo autonómico debe ser fundamental como o ten sido dende a declaración da emerxencia sanitaria no territorio da Comunidade Autónoma polo Consello da Xunta de Galicia o pasado 13 de marzo”.
José Ramón Lete Lasa, secretario xeral para o Deporte da Xunta de Galicia: “a coordinación cos axentes e o tecido deportivo autonómico debe ser fundamental”