A Universidade de Santiago de Compostela a través da Fundación Dieta Atlántica presentou esta semana un volume titulado Bases científicas da Dieta Atlántica, en colaboración con Vegalsa-Eroski e a Sociedade Española de Obesidade. Na presentación estivo o secretario xeral para o Deporte, José Ramón Lete Lasa, que destacou o rol da dieta.
Nas súas palabras, esta é “a mellor aliada da actividade física na consecución do benestar persoal e social”. Aproveitou tamén para recordar as palabras de Hipócrates quen xa dicía hai máis de vinte séculos que “o teu alimento sexa a túa medicina e a túa medicina sexa o teu alimento, unha afirmación que hoxe segue plenamente vixente”.
Lete Lasa lembrou así mesmo o Plan Galego para o Fomento da Actividade Física Galicia Saudable, activo desde o 2009, co finalidade de facer fronte ao aumento das mortes, enfermidades e discapacidades provocadas polo sedentarismo e a práctica insuficiente de actividade física. O programa foi liderado pola Xunta en colaboración coas universidades galegas e os doutores Felipe Casanueva e Rosaura Leis.
O secretario xeral felicitou á Fundación da USC por este libro que identificou como un fito importante na concreción das bases científicas da dieta atlántica da que xa foi un pioneiro o profesor Tojo Sierra. Do mesmo xeito agradeceu a colaboración de Vegalsa-Eroski e salientou a importancia da iniciativa privada.
A Dieta Atlántica comprende un conxunto de hábitos alimentarios e estilo de vida que une os territorios de Galicia e o Norte de Portugal e cuxas claves se basean no abundante consumo de peixes, lácteos e produtos de frescos, técnicas culinarias sinxelas e a mellor forma de conxuntar unha comida pracenteira en compañía de familia e amigos.