Unha de cal e outra de area. Se hoxe a dianteira cántabra asinaba a súa renovación co RC Deportivo ABANCA, tamén se coñecía que as probas médicas realizadas a Athenea daban coma resultado que a xogadora deportivista sufre unha lesión muscular. Esta circunstancia apartaa da Selección Española Sub 20, para a que fóra convocada, e tamén do partido desta fin de semana contra o CD Tacón.
Á futbolista do RC Deportivo ABANCA fixéronse probas médicas logo do partido de Copa da Raíña disputado no Estadi Johan Cruyff de Barcelona. O resultado é que a xogadora cántabra sofre unha lesión muscular no semitendinoso da perna esquerda.
Tratamento previsto para Athenea
Para recuperarse desta lesión, a atacante deportivista estará uns días recibindo tratamento médico e de fisioterapia. A previsión é que logo dese proceso, a deportivista pase xa a unha fase de readaptación deportiva que a levará posteriormente ao seu regreso aos adestramentos co resto do equipo que prepara Manu Sánchez.
Segundo informa o RC Deportivo, os servizos médicos do club xa ten informado desta lesión á Federación Española de Fútbol. Este contratempo fai que Athenea del Castillo se caia da convocatoria do combinado español Sub 20 para a que tiña sido chamada. A Roja ten previsto disputar a vindeira semana varios partidos amistosos en San Pedro del Pinatar. Alí estarán as súas compañeiras Tere Abelleira e María Méndez.
O seleccionador da Roja Sub 20, Pedro López, xa convocou a Eva Navarro, do Levante, como substituta da xogadora deportivista lesionada.
