As Leonas XV de rugby vencen o partido Estrelas Iberdrola

Galicia e os seus equipos tiveron representación no chamado partido das ‘Estrellas Iberdrola’ que a Selección Española de rugby disputou contra unha selección de xogadoras da máxima categoría do oval estatal. Mónica Castelo e Paula Alevín Medín pola parte das Leonas e Judith Hernández no bando das Estrellas Ibedrola. Todas elas son xogadoras do CRAT Residencia Rialta

As Leonas, Selección Española de Rugby / FER

Tal e como informaba a Federación Española de Rugby, “Case once meses despois, a Selección feminina de XV volveu competir e levou a vitoria na cuarta edición do partido das Estrellas Iberdrola, celebrada no Campo do Pantano, na localidade alacantina de Villajoyosa. Grazas ao impulso de Iberdrola e á colaboración do CR La Villa, o encontro, que puido verse a través de LaLigaSportsYTV, foi todo un éxito e as xogadoras puideron volver gozar do que máis lles gusta”.

O resultado de 59-0 favorable ao combinado de José Antonio Barrio Yunque quedou nun segundo plano durante un evento que, do mesmo xeito que no últimos tres anos, converteuse nunha referencia para a promoción do rugby feminino, que xa está de novo en marcha e pechará o ano no alto coa continuación da liga Iberdrola. A máxima categoría dará comezo o próximo fin de semana, do 12 ao 13 de decembro.

Ademais, e dentro da campaña #YoSeréLeona da Federación Española de Rugby (FER) para un impulso á párticipación de máis nenas no noso deporte e a retención das moitas que xa o fan, as internacionais de ambos os equipos levaron medias dos clubs aos que amadrinan.

A superioridade de España ante o cadro das Estrellas Iberdrola tardou bastantes minutos en verse reflectida de forma clara no marcador, sendo este ao cabo relativamente enganoso, pois o conxunto dirixido por Pedro de Matías, seleccionador do Seven feminino, tivo varias rupturas de liña prometedoras e máis dun contraataque incisivo.

Finalmente, a contundente defensa en zona de 22 propia, xunto coa gran precisión nas fases estáticas e os ataques en continuidade, foron algunhas das claves que impediron ao rival das Leonas transformar a súa boa imaxe en puntos. Os ensaios das Leonas XV foron de María Losada (2), Olivia Fresneda, Amaia Erbina (2), Lucía Díaz, Anna Puig, Anne Fernández de Corres e Amalia Argudo, con tres transformacións de Patricia García e catro da mencionada Argudo.

Paula Medín, capitá das Leonas

Ao termo do encontro, Paula Medín Alevín, capitá das leonas tras a ausencia por lesión de Isabel Rico e unha das máis destacadas no bando de Barrio, recolleu o premio que acredita ao seu equipo como gañador desta excepcional edición do partido das Estrellas Iberdrola.

Precisamente, habituais como Rico, Iera Echebarría ou María García, entre outras, quen por distintos motivos non puideron ser da partida, foron as receptoras de varios xestos e dedicatorias cos que as súas compañeiras quixeron telas presentes durante todo o día e en especial ao longo dos 80 minutos.

Pola súa banda, Lucía Castro, medio melé do Corteva Cocos Rugby e que hoxe formaba parte das Estrellas Iberdrola, levou o premio MVP Iberdrola á mellor xogadora do choque, mentres que a pilier Marta Estellés, do CR Majadahonda, recolleu o premio de subcampioas da man da vicepresidenta da FER, Mariola Rus.

Os galardóns completábanse ao recoñecer un labor indispensable para a práctica do noso deporte, como a da arbitraxe, que este sábado foi desempeñada cunha boa actuación pola colexiada Lorena Martínez.

Para rematar os motivos de celebración, unha das impulsoras da campaña #YoSeréLeona, a terceira liña María Losada, puido volver xogar coa Selección un ano e medio despois de lesionarse coas Leonas7s.

Pola súa banda, Ingrid Algar, no seu caso representando ás Estrellas da liga, tamén regresaba tras un periplo complicado a nivel de lesións. É unha magnífica noticia telas de volta.

Sen dúbida, o seleccionador e o seu corpo técnico non poden sacar máis que conclusións positivas e esperan seguir nesta liña de compenetración do equipo e asentamento das máis novas de cara aos retos que están por vir. A fase de clasificación para a Copa do Mundo de Nova Zelandia 2021 achégase e todas empuxaremos xuntos a fin de axudar a este equipazo a que siga facendo historia.