Todo o que sume conta. O Cidade de As Burgas regresa cun puntiño da súa saída a terras madrileñas onde mediu forzas con CD Leganés FS e o enfrontamento quedou en táboas. Pero seguramente se lles preguntásemos ás galegas dirían que o partido tivo, exactamente, dous segundos demáis.
Un empate a 4 goles foi o resultado final deste encontro correspondente á undécima xornada. Os puntos repartidos fan que nin ourensás, nin madrileñas se movan na táboa clasificatoria pero, como decíamos ao inicio, todo o que suma é bo. Puntuar ante un equipo que ten máis do dobre de puntos ca ti, como mínimo dará ás as de Manolo Codeso, que viron como as locais lles empataban sobre a bucina.
As futbolistas do Cidade de As Burgas eran as únicas galegas que xogaban esta fin de semana na Primeira División do Fútbol Sala feminino da RFEF. A COVID-19 foi illando aos equipos galegos ou aos seus rivais e adiando partido tras partido ata reducir a axenda do futsalfem galego nesta categoría a un único partido.
Se a previa do partido, xa foi accidentada, ao ver como se ían aprazando encontros, a xornada en si mesma seguíu o mesmo camiño. Logo de instalarse no vestiario do Pavillón de La Fortuna as galegas tiveron que mudar de escenario debido a que o temporal fixera mella na instalación. O partido trasladouse ao Polideportivo Europa. Esta circunstancia motivou un pequeno retraso no inicio do choque entre galegas e madrileñas.
Unhas e outras debían ter ganas de sentenciar o partido rapidamente xa que non se levaban disputados nin catro minutos do encontro cando o marcador electrónico xa sinalaba un 1-2 para as visitantes.
Empezaron anotando as locais por medio de Chuli Noreña no minuto 2. Un minuto despois, chegou a avalancha ourensá para lle dar a volta o partido. Caeron dous goles seguidos. O primeiro de Amelia e o segundo de Lucía Nespereira de falta. O dito, no minuto 3 de partido xa o luminoso apuntaba un 1-2 para o Cidade de As Burgas.
As galegas seguirían incrementando a súa vantaxe cun gol de Sol Pedrera no minuto 16 (1-3). Antes de chegar ao descanso o CD Leganés reduciría a renta visitante anotando un gol no minuto 17 (2-3) por medio de Guti, á postre, esta futbolista sería autora dun hat trick neste encontro.
Pero non imos adiantar acontecementos xa que antes de que Guti volvese a marcar o farían o Cidade de As Burgas colocando un cómodo 2-4 no marcador. O gol, obra de Fara Antolín, anotaba dentro da área a pase de Clara Fernández.
O conxunto que adestra Manolo Codeso empregouse na presión e na defensa do seu terreo para evitar as chegadas do CD Leganés e conservar un trunfo que acariñaban cos dedos.
A porteira xogadora funcionoullle ao CD Leganés
Optou o conxunto local polo xogo de cinco e déulle resultado. Guti foi quen de bater a Ana Lastra (3-4) que, non en tanto, salvou varios goles. Tiros ao pau e demasiado estrés nos arredores da meta ourensá. So un gol de vantaxe era pouca renta para un Cidade de As Burgas que estaba véndose moi esixido polo xogo das pepineras.
Dous segundos, so dous segundos antes de que soase a bucina, os peores temores das galegas fixéronse realidade. Guti anotou o terceiro, fixo o seu particular truco do sombreiro e con ese abracadabra de maxia non sacou un coello da chistera pero si fixo que o partido rematou en táboas.
Os tres puntos que tanto tiñan traballado as de Manolo Codeso escorrentáronselles entre os dedos e reducíronse a un so no último suspiro do encontro (4-4)
IMÁGENES | Preciosas las imágenes del partido entre @CDLeganesFS_Fem y @cidadeasburgas. Emoción, pasión y entrega que se reflejan en cada una de ellas. ¡No os perdáis el álbum del partido!
👉 https://t.co/IJEgLMUnU3#VamosLega pic.twitter.com/qzHAExiEfS
— C.D. Leganés Fútbol Sala Femenino (@CDLeganesFS_Fem) January 24, 2021
FICHA TÉCNICA
4) CD LEGANÉS FS: Míriam, María Barcelona, Noreña, Esther Puche e Guti – quinteto inicial -. Tamén xogaron: Laura Stone, Pipi, Patri Montilla, Yrezábal, Paula Molano e Luci Sánchez.
4) CIDADE DE AS BURGAS: Ana Lastra, Lucía Nespereira, Amelia, Fara Antolín, Clara Fernández – quinteto inicial -. Tamén xogaron: Sonia Pacios, Sol Pedrera e Nahir Oliveira.
GOLES: 1-0, min. 2: Chuli Noreña; 1-1, min. 3: Amelia; 1-2, min. 3: Lucía Nespereira; 1-3, min. 16: Sol Pedrera; 2-3, min. 17: Guti; 2-4, min. 22: Fara Antolín; 3-4, min. 36: Guti; 4-4, min. 40 Guti.
ÁRBITROS: Moreno Durán e Sarasúa, ambos os dous do comité madrileño. Amonestaron con cartón amarelo ás futbolistas locais Chuli, María Barcelona e Patri Montilla, así como ás visitantes: Sol e Sonia Pacios.
INCIDENCIAS: Partido correspondente á undécima xornada da Primeira División do Fútbol Sala Feminino. O entro ía disputarse no pavillón La Fortuna pero tivo que trasladarse de cancha ao Polideportivo Europa.