A Selección Galega de ciclocrós triunfou no Campionato de España celebrado en Xàtiva, onde Laura Mira fíxose coa prata na categoría júnior.
O conxunto galego tamén sumou o ouro júnior de Ricardo Buba e o bronce sub23 de Miguel Rodríguez. A eles engádese a terceira posición do elite Iván Feijoo coas cores do seu novo equipo, o MMR.
En categoría cadete, as medallas seguiron a cargo de María Filgueiras, ouro, e Aroa Otero, prata. No máster 40A, Marina González foi vencedora. Andrés Calvete (Selección de Galicia) rematou segundo no 40A; e Moisés Leboso (G.D. Diez) fíxose coa terceira paza no 40B.
Os representantes autonómicos acumularon unha decena de podios na primeira gran cita do ciclismo estatal no 2022. Unha actuación de dez nun circuíto moi rápido e seco, que en principio non era o máis favorable as súas condicións, explican desde a Federación Galega de Ciclismo.
De novo prata para Mira
Por terceiro ano consecutivo Laura Mira subiu ao podio do Campionato de España de Ciclocrós. Gañadora cadete no 2020 en Pontevedra, a porriñesa repetiu en Xàtiva a prata júnior acadada o ano anterior en Torrelavega.
Na última xornada da competición, a xuvenil da Selección de Galicia comezou mandando no arranque, pero Marta Beti (Cantabria) fixo o seu mellor parcial na primeira volta e resultou inalcanzable para a galega.
A cántabra venceu por 31” de marxe e Mira mantivo con solvencia a segunda posición. María Modenes (Euskadi) fíxose co terceiro posto a 23” da ciclista do Porriño. Entre as 30 primeiras remataron tres galegas máis: Uxía Soto (Selección) 12ª, Vania Gregores (Ponteareas) 21ª, Sarela Conde (Selección) 24ª e Sonia Domínguez (Team Farto-BTC) 27ª.
As juniors compartiron quenda coas elites e sub23. Nunha carreira raíña feminina que foi un monólogo da elite asturiana Lucía González (Nesta), empezou moi forte Irene Trabazo. A elite da Selección, cuarta na primeira volta, terminou ocupando a novena posición absoluta e a sexta na súa categoría. A 36” da marinense e a 49” do bronce sub23 quedou Carla Fernández (Selección). Á viguesa, undécima na xeral, correspondeulle a cuarta praza no seu grupo de idade.
Filguerias cumpriu como favorita
Na xornada anterior, a betanceira María Filgueiras, partía xa como clara favorita entre as cadetes, ao ter resultado gañadora esta temporada da Copa de España.
A ciclista galega non defraudou e dominou na proba desde o esprint inicial, poñéndose á fronte do pelotón, ata o final. A súa calidade no pedaleo provocou un corte de catro corredoras no que entraron as súas compañeiras de selección Aroa Otero e Lorena Patiño.
Filgueiras: “Tratei de saír ben e manter o ritmo durante toda a carreira, sobre todo evitando erros”
En declaracións á Federación Española de Ciclismo, Filgueiras asegurou que o seu plan foi “saír ben e manter o ritmo durante toda a carreira, sobre todo evitando erros”. A betanceira non tardou en marcharse en solitario e manexou ata o treito final unha vantaxe ao redor dos 20 segundos.
Leyre Almena (Teika) era a ameaza para a tripla galega no rápido circuíto valenciano. Patiño non puido manter o ritmo das súas dúas acompañantes, que loitando pola segunda praza acabaron por achegarse moito á betanceira.
Filgueiras, cun tempo de 27:33, venceu por 4” de vantaxe a Otero. A porriñesa dobregou pola mesma diferenza a Almena e a santiaguesa Patiño concluíu a 43” da vencedora.
“Máis ou menos levaba controlada a distancia con respecto as miñas rivais e, aínda que na última volta me recortaron bastante, puiden facerme coa vitoria”, engadi Filgueiras, quen fora xa subcampioa no 2021.
As outras dúas representantes das selección dirixida por Alberto del Río tamén acadaron boas posicións: Marta Estévez finalizou décima e Iris Fernández duodécima.
#CECXXativa22 | 🎙️ Los nuevos campeones de España de Ciclocross en categoría cadete, María Filgueiras y David Ivars, nos ofrecen sus impresiones tras conquistar el título
¡Gran carrera de ambos! 💪 pic.twitter.com/WPY1l8pcRX
— Real Federación Española de Ciclismo (@RFECiclismo) January 8, 2022
González, ouro máster
Dentro das categorías máster, Marina González, participando co seu equipo, o Illas Cíes Cycling Team, logrou a vitoria absoluta na proba feminina.
A verinesa afincada en Vigo recibiu a camisola de campioa máster-40A subida ao chanzo máis alto do podio.
En segunda posición rematou Ruth Moll (Oviedo.es), a quen a galega superou por 27”, e na terceira praza acabou María Fernández (Mountain Bike Madrid).
Noutras categorías, Eva Ortega (Biciosos Rías Baixas) obtivo o cuarto posto nas 30B e Sonia Costoya (Corbelo), a sexta nas 50A.
As cadetes lideran o repóker de medallas do ciclocrós galego no segundo día do Campionato de España
