A galega Laura Martínez competiu no Campionato Mundial que se está a celebrar en Budapest, rematando na sétima posición nos -48kg ao caer eliminada ante a arxentina Keisy Perafran. Actualmente a judoka ocupa a 12ª posición no ránking mundial. O torneo internacional comezou o pasado domingo, 6 de xuño, e finalizará o vindeiro día 12.
O camiño da deportista nesta competición internacional comezou co cruce na segunda rolda ante a israelí Shira Rishony, quen vencera á galega no Campionato de Europa Senior do pasado mes de abril. Desta vez, Martínez foi a vencedora do duelo, pasando á terceira rolda.
Nesta fase, a rival da judoka foi Mary Dee Vargas Ley, de Chile, quen tampouco foi quen de triunfar sobre a galega. Con este resultado de 1-0 ao seu favor, a deportista lograba o pase a cuartos. A seguinte rival, a kosovar Distria Krasniqi logrou derrotar á española obigándolle a competir na repesca.
Finalmente, este sería o derradeiro duelo da judoka galega, ao non pasar nesta segunda oportunidade ante a arxentina Keisy Perafan.
Revive aquí o último combate de Laura Martínez no Mundial de Budapest:
A española Julia Figueroa enfrontaríase despois á arxentina na loita pola terceira posición, despois de perder en semifinal ante a xaponesa Koga. A cordobesa logrou acadar o bronce para España na categoría dos -48kg.
Pola súa banda, a tamén galega Estrella López Sheriff caeu derrotada este luns nos -52kg ante a uzbeka Diyora Keldiyorova. Aquí podes revivir o combate:
