Corría o minuto 70 do partido entre o Dépor ABANCA e a SD Eibar cando Laura Fernández deixaba o seu sitio a Eva Dios debido a unhas molestias. A futbolista tiña unha escordadura no seu nocello esquerdo.
O doutor Alejandro Mejuto e os Servizos Médicos do Real Club Deportivo comprobarán a evolución nos próximos días da atacante deportivista Laura Fernández. Agora a futbolista está en repouso deportivo, antes de comezar a súa etapa de readaptación física, paso previo ao seu regreso aos adestramentos co grupo.
Con respecto ao traballo semanal do Dépor ABANCA o equipo que prepara Irene Ferreras disporá dunha semana longa de adestramentos previa á próxima cita en Primera Federación FutFem, de novo en Abegondo o domingo 6 de novembro ás 12:00 horas. O partido será diante o SE AEM e corresponde á 8ª xornada da liga. Está pendente de ver a evolución de Laura Fernández e outras xogadoras lesionadas como Carlota Sánchez ou Letti Sevilla, de cara a ese partido
Os resultados deixaron a As Nosas deportivistas na terceira praza da categoría con 14 puntos, igualadas co FC Barcelona B. O equipo coruñés conta con tres puntos de desvantaxe coa SD Eibar (o seu último rival), que marcha líder con 17.
Irene Ferreras ordenou desde cinco sesións de traballo matinais na Cidade Deportiva para o Dépor ABANCA. A primeira xa tivo lugar o luns. O día de descanso foi onte, martes, día festivo. As futbolistas teñen que presentarse na instalación cada día ás 8:30 para realizar antes de saltar ao campo tarefas previas como ximnasio ou vídeo.
O resto da planificación semanal, sempre susceptible de sufrir variación por razóns técnicas, é a seguinte:
- Mércores 2 de novembro 10:00 h.
- Xoves 3 de novembro 10:00 h.
- Venres 4 de novembro 10:00 h.
- Sábado 5 de novembro 10:00 h.
- Domingo 6 de novembro 12:00: Deportivo ABANCA – SE AEM, en Abegondo
