Laura Doce pasa a ser a segunda incorporación do primeiro persoal do Viaxes Amarelle para a nova tempada 2020/2021. A promesa ferrolá vén de disputar as dúas últimas tempadas co Ourense Envialia FSF e loitando polos postos nobres da competición nacional.
Doce, con 22 anos, é outra xogadora nova para o primeiro plantel do Viaxes Amarelle, pero que conta con experiencia na Primeira División Nacional Feminina de Fútbol sala tras os seus dúas últimas campañas no primeiro equipo do Ourense Envialia, sendo unha das súas xogadoras importantes, e nun equipo loitando polos postos nobres, e mesmo esta última tempada xogando o play- off polo título de liga.
A pesar de xogar no equipo ourensán as dúas últimas campañas, a xogadora ferrolá formou parte, en toda a súa etapa de formación, do Comarcal A Fervenza, competindo desde competicións provinciais ata Segunda División Nacional de Fútbol sala Feminino e confirmándose sempre como unha xogadora referente do conxunto de ferrolterra nas súas distintas categorías.
Para coñecela un pouco mellor, e saber da súa visión de fronte a nova tempada, o conxunto herculino realizou unha entrevista coa súa nova xogadora:
Pregunta: Como afrontas esta nova experiencia?
Resposta: Moitas grazas. A verdade é que teño moitas ganas e moita ilusión posta nesta nova etapa, estou a desexar empezar a traballar co grupo e o corpo técnico. Tamén cun pouco de incerteza pola situación sanitaria que estamos a vivir pero oxalá todo vaia o mellor posible e podamos gozar do noso deporte sen paróns.
P: Despois da fantástica tempada co Ourense Envialia loitando polo título de liga. Que che fixo decidir para competir co Viaxes Amarelle?
R: Foron 2 anos nos que creo que crecín unha chea a nivel futbolístico e persoal, madurei moito dentro e fóra da pista. Considérome unha persoa de club, estiven toda a vida na Fervenza, a miña casa, e gustaríame volver ter ese sentimento de “familia” no deporte e creo que este é o sitio idóneo para iso. Ese foi un dos motivos de maior peso para decidirme polo Amarelle, ademais do proxecto do club e da figura de Jorge á fronte del.
P: Se seguiches durante esta tempada ao Viaxes Amarelle, cal é o teu punto de vista sobre a súa aposta de xogo e a tempada que realizaron?
R: Por desgraza ao estar en diferente categoría e non estudar ao Amarelle para o scouting e non ter a visibilidade nin retransmisións por tv que nos gustaría non puiden ver moito partidos pero o que vin… Paréceme un equipo moi traballado tanto tácticamente como a balón parado, moi organizado, que sabe ao que xoga e tamén a mentalidade de ir tod@ s a unha, que é moi importante.
P: A media de idade do plantel do Amarelle vai ser unha das máis novas da Primeira División, ves que a idade pode ser un hándicap para o equipo?
R: Si, mentiría se dixese que nalgún momento da tempada ou dos partidos nótase a experiencia das xogadoras na pista, aínda que a experiencia non sempre concorde coa idade. Aínda que tamén creo que en moitos puntos pode xogar ao noso favor a nosa mocidade; confío en que lle sacaremos partido.
P: Que crees que podes achegar ao grupo e ao equipo para esta nova tempada?
R: Espero achegar positividade e boas sensacións ao grupo. Na pista gustaríame achegar calma e cabeza, calidade e dominio do balón, pero sobre todo traballo e estar ao dispor das necesidades do equipo.
P: Será a terceira tempada de Jorge Basanta no banco do club. Coñecíalo persoalmente con anterioridade? Que che parece a súa metodoloxía de traballo?
R: A verdade é que en persoa nunca o coñecín nin traballei con el. Pero os seus equipos transmítenme o que aí arriba dixen, orde e unión. As referencias que teño del son moi boas, e veño con moitas ganas de aprender.
P: Que esperas do Amarelle esta tempada na Primeira División Nacional Feminina?
R: Aínda sen saber como vai ser a competición, número de equipos, postos de descenso etc… Se que imos ter que pelexar moito, adaptarnos rápido á categoría e non descoidarnos nin 1 segundo en cada partido, minimizar puntos débiles e saber explotar os fortes. Pero se estou aquí é porque confío ao 200% neste persoal para alcanzar os obxectivos.
P: Para despedirnos, gustaríanos deixarche á túa elección; as palabras que queiras dirixir tanto á afección, como familia.
R: Simplemente dar as grazas a todas as persoas que tiveron que ver en que hoxe forme parte deste proxecto e dicir que tod@ s traballaremos para dar o mellor de nosotr@ s e gozar deste deporte, que así as cousas saen moito mellor!!!!
Desde o club coruñés quixeron agradecer a súa nova xogadora pola confianza depositada no conxunto laranxa e “formar parte do equipo nesta nova tempada; asumindo o reto de traballar co Viaxes Amarelle FSF, para que o equipo aséntese na elite do fútbol sala feminino nacional. Esperamos que sexa unha tempada satisfactoria para ambos, tanto en obxectivos persoais, como de grupo”, relata o Viaxes Amarelle no seu comunicado.