De Abegondo a Florida. Das cebras do Victoria CF aos Titans do Eastern. En só uns meses a vida de Laura Cetina cambiou por completo. A deportista abegondesa recibiu a comezos deste ano unha oferta que non puido rexeitar: unha beca para compaxinar os estudos co fútbol na universidade estadounidense Eastern Florida. Encheu a maleta de ilusión e foise á aventura.
Polo de agora, non lle vai nada mal. Vén de gañar o campionato nacional da primeira división da National Junior College Athletic Association (NJCAA) grazas a un penalti cometido sobre ela e de ser nomeada mellor xogadora do torneo.
Por se isto fose pouco, o seu nome quedará gravado para sempre na historia do EFSC Titans Sports, ao ser a primeira vez que o equipo consegue este título. A súa vida cambiou pero o seu fútbol non coñece fronteiras. Sumémoslle aos últimos logros de Laura Cetina que tamén a incluíron o 11 All-American Team e hai so uns días foi distinguida como mellor dianteira do Grupo I da Primeira División do fútbol Español na tempada pasada durante I gala de Premios Golsmedia.
Ver esta publicación en Instagram
A.N.: Levas uns meses en Estados Unidos e xa eres campioa de liga e ademais nomeada MVP da final. Como se di por Galicia, chegar e encher!
LAURA CETINA: Si, a verdade é que xa conseguín máis aquí, nos Estados Unidos, que en España (risas). En definitiva, foi un ano moi bo, sumando ademais o campionato de liga co Victoria. E sobre todo ser a MVP do torneo!
A.N.: Que sentiches cando o anunciaron?
LAURA CETINA: Unha enorme alegría; ademais de que outra compañeira tamén foi escollida como a mellor defensa do torneo.
A.N.: Xogáchedes ante un rival que levaba 52 vitorias consecutivas. Eran elas as favoritas?
LAURA CETINA: Si que serían nun primeiro momento pero cando o partido empezou, podíase ver que estábamos moi igualadas.
A.N.: É a primeira vez que a Eastern Florida State College gaña o campionato. Desde a universidade marcáronche ese obxectivo cando chegaches?
LAURA CETINA: Non, aínda que si que se notaban esas gañas de gañar o campionato. Como deportista, un sempre busca a vitoria.
A.N.: Puidemos ver que non te separaches da bandeira galega na celebración. Hai morriña?
L.C.: A verdade é que si, hai moita morriña! E tamén é unha oportunidade para ensinar a bandeira galega ao resto do mundo.
O festexo do título de Laura Cetina foi coa bandeira galega, a futbolista admitiu “que si, hai moita morriña!” e engadiu que ese momento no que gaña o título e a nomean Mellor Xogadora do Toreno “E tamén é unha oportunidade para ensinar a bandeira galega ao resto do mundo”
A.N.: Como foi ese momento no que chega o interese das universidades de Estados Unidos de contar contigo?
L.C.: Complicado. Debido á pandemia reduciuse o diñeiro das universidades. Eastern apostou por min e estou moi agradecida por elo.
A.N.: Finalmente escolliches a Eastern Florida State College. Por que? Foi unha decisión difícil?
L.C.: Non foi unha decisión difícil porque esta universidade ten todo o que eu estou a buscar.
A.N.: Que tipo de condicións tes por ser deportista universitaria?
L.C.: Temos que ter, polo menos, un 7 en todas as materias para poder xogar os partidos. Esa é a que máis destaco.
Laura Cetina: “O campus é como nas películas”
A.N.: Todo iso que se percibe nas películas e series sobre o mundo universitario estadounidense é real ou é unha esaxeración?
L.C.: Si, a verdade é que si. Este ano polo tema COVID, algunhas clases son virtuais pero, cando me achego á universidade, todo é como unha película.
A.N.: Cóntanos como é un día normal na túa vida desde que te levantas ata que te deitas.
L.C.: Resido no campus da universidade e érgome ao redor das 8 da mañá, vou a clase e despois, cando remato, temos que estar ás 13:30 horas no campo de fútbol para adestrar ata as 15:30 horas. Dependendo dos días vamos ao ximnasio ou non e, ao acabar, descanso un pouco e póñome coas cousas que me mandaron na universidade, ceo e vou para cama ao redor das 23 horas.
A.N.: É máis doado aí compaxinar os estudos e o deporte?
L.C.: Si, é moito máis doado porque se imos a xogar a algún lado cambian o exame ou, incluso, tes máis días para facer os traballos.
A.N.: Cal é o nivel da NJCAA comparándoo co que hai en Galicia e en España?
L.C.: É moito máis físico pero algúns equipos, como no que estou, tratan de xogar ese fútbol europeo de toque.
A.N.: Que expectativas tes de futuro?
L.C.: Pois sacar adiante a carreira como primeira opción e, despois, futbolisticamente, chegar o máis lonxe posible.
A.N.: É as do equipo? Cal é o seguinte reto?
L.C.: Manterse sendo número 1 da NJCAA e volver a loitar por gañar o premio.
A.N.: Non paras de recibir boas novas, acabas de recibir o premio Golsmedia 2021 á mellor dianteira de 1ª Nacional do Grupo 1. Agardábalo?
L.C.: Tiña as miñas dúbidas porque hai xogadoras de equipos potentes que teñen máis peso á hora de tomar esas decisións pero sempre fun consciente das miñas opcións.
Laura Cetina, agora no EFSC Titans e ex cebra: “Claro que sigo as miñas ex compañeiras. Sempre busco como quedaron ou intento ver o partido que estean a xogar. Foi unha moi boa etapa nun gran club como é o Victoria. Vexo que segue habendo esa esencia que sempre se ten no Victoria”
A.N.: Como ves ás túas ex compañeiras do Victoria esta temporada? Tes tempo para seguilas?
L.C.: Claro que as sigo. Sempre busco como quedaron ou intento ver o partido que estean a xogar. Foi unha moi boa etapa nun gran club como é o Victoria. Vexo que segue habendo esa esencia que sempre se ten no Victoria.
Ver esta publicación en Instagram
Cris Oreiro: “Estes premios son grazas ao traballo do ano pasado”
