O libro ‘Las diez mil hijas de Irene’ presentábase hoxe no Estadio de Riazor da Coruña. A obra, do xornalista herculino Álex Centeno, fai un repaso polas mulleres que forman parte da historia do fútbol galego. Desde a porteira coruñesa Irene González, a Vero Boquete, pasando polas máis de 6.000 mulleres con licencia da Real Federación Galega de Fútbol (RFGF) nesta tempada 2022-23 e que forman parte da festa do balón: xogadoras, adestradoras, árbitras, sanitarias… Todas elas son, dalgúns xeito, fillas de Irene.
Desas mulleres bravas do deporte galego falan as páxinas desta obra que edita LAR Libros e que relata cen anos de futfem en Galicia. En definitiva ‘Las diez mil hijas de Irene’ recolle a historia de As Nosas mulleres do fútbol galego.
Ver esta publicación en Instagram
A alcaldesa da Coruña, Inés Rey, presentou esta tarde o libro ‘Las diez mil hijas de Irene’ do xornalista Álex Centeno. A obra recolle a historia do fútbol feminino en Galicia dende Irene González, a primeira xogadora de fútbol en España, ata Verónica Boquete, actual xogadora. “Con esta obra facemos unha importante homenaxe non só a Irene González, senón a todas as súas fillas, repasando a historia de todas aquelas pioneiras que pouco a pouco fixeron o mellor equipo para combater a desigualdade no mundo deportivo” explicou Inés Rey.
No libro recóllese información, imaxes e historias de diferentes mulleres no mundo do fútbol. Xogadoras, entrenadoras, árbitros ou equipos femininos. No acto interviu a alcaldesa, Inés Rey; xunto con Gonzalo Trenor, delegado da Xunta de Galicia na Coruña e Álex Centeno, autor do libro. A rexedora destacou que o fútbol galego “ten un marcado carácter coruñés recollido neste libro” en alusión á orixe de Irene González como primeira xogadora de fútbol.
Tamén lembrou outros fitos recollidos no libro como a orixe do Karbo, o primeiro club feminino campión de España que ten a súa orixe nos Mallos. Varias representantes do histórico club galego estiveron presentes no acto. Alí estiveron entre doutras Inma Castañón, Pili Neira, Lis Franco e o adestrador, José Mañana.
Destacaba Inés Rey na presentación de ‘Las diez mil hijas de Irene’ “Momentos nos que houbo mulleres que deron a coñecer os seus nomes pasando a firmar un importante capítulo do relato desta cidade como tamén fixeron Pili Neira, Teresa, Inma e Manola ao obter o título de adestradoras a nivel nacional, as catro primeiras mulleres en España en facelo”.
A alcaldesa rematou agradecendo a Álex Centeno o seu traballo para este volume e reivindicou que “fan falla máis Irenes González e Verónicas Boquete, mais tamén moitas máis Pilis Neira ou Inmas, Manolas e Teresas nas que as nenas do mañá se vexan reflectidas para conquistar o futuro dende o presente”.
A obra do xornalista Álex Centeno, constitúe a primeira historia do fútbol feminino galego que se publica. A primeira edición do libro, que saíu á rúa o pasado 8 de marzo con motivo do Día Internacional da Muller, ten unha tirada inicial de 4.500 exemplares, dos cales xa se venderon 3.800, o que indica a boa acollida que está a ter. Actualmente, a publicación está á venda a través da web www.lasdiezmilhijasdeirene.es
As historias que contén ‘Las diez mil hijas de Irene’
Unha terra de loitadoras como é Galicia non podía ser menos no mundo do fútbol. Na esquina noroeste da Península naceu Irene González, a primeira xogadora que pode considerarse profesional, pois xa nos anos 20 cobraba por xogar ao fútbol. Ela abriu o camiño para que outros miles de bravas galegas tivesen máis sinxelo (aínda que nunca chegou a ser fácil) xogar ao fútbol sen complexos e con valentía.
‘Las diez mil hijas de Irene’ é unha homenaxe a esas dez mil fillas de Irene que durante un século permitiron que o fútbol feminino en Galicia non morrese. É unha alegación á igualdade ao redor dun balón e sobre un rectángulo pintado con cal. O exemplar que teñen nas súas mans conta a historia do fútbol feminino en Galicia, si. Pero tamén as súas intrahistorias. Poderán ler, baixo o relato dos seus protagonistas, unha serie de vivencias pasadas e presentes.
Desde o día que unha patrulla da Garda Civil case suspende un encontro porque un cura denunciara que as futbolistas ensinaban os xeonllos; ata o partido a partido dunha xogadora profesional que se atopa recluída no centro penal de Teixeiro. Coñecerán á madriña do fútbol galego, pero tamén á súa avoa, ás primeiras adestradoras nacionais, con selo galaico, a primeira árbitra, de idéntica procedencia…
Historias e curiosidades dun deporte do que no seu día se apropiaron os homes, pero polo que loitaron as mulleres. Por último, este libro serve tamén de consulta e de fotografía do fútbol no ano 2023. Cada club ten o seu espazo reservado a modo de consulta, coa súa xunta directiva, a súa vestimenta, o seu contacto…
E, finalmente, a gran homenaxe ao case seis mil triunfadoras que na tempada 2022-2023 tiveron unha licenza expedida pola federación: desde xogadoras a árbitras, incluíndo sanitarias, adestradoras… Todas aparecen co seu nome e apelidos na publicación.
En definitiva, este libro é un recoñecemento a Irene e os seus dez mil fillas, que nin se renderon, nin se renden, nin se renderán xamais.
O autor, Álex Centeno
O xornalista Álex Centeno é o autor do libro ‘Las diez mil hijas de Irene’. Naceu o 25 de setembro de 1973 no barrio coruñés da Sagrada Familia. Exerce a súa labor como informador en La Voz de Galicia desde o ano 2000, medio ao que chegou tras traballar en El Ideal Gallego e colaborado en Radio Culleredo.
Diplomado en Ciencias da Educación pola Universidade da Coruña, é Máster en Xornalismo de Investigación, Datos e Visualización pola Universidade Internacional da Rioxa; Máster en Xornalismo e Comunicación Dixital polo Instituto Europeo de Estudos Empresariais en colaboración coa Universidade Nebrija; e, actualmente, cursa o Máster en Investigación en Actividade Física, Deporte e Saúde na Universidade da Coruña.
Álex Centeno é colexiado número 1.038 é tamén membro da Federación de Asociacións de Xornalistas de España (FAPE) e representante en Galicia da Asociación de Xornalistas de Investigación (API).
No ámbito literario, é coautor de ‘Fran, o Neno 10’ (Biblioteca Galega, 2005), biografía autorizada do excapitán do Real Club Deportivo da Coruña e ex xogador da selección española de Fútbol, Francisco Javier González Pérez.
Do mesmo xeito, colaborou en publicacións como o catálogo da exposición Valor e Mestría que organizou a Xunta de Galicia no ano 2018 e na obra benéfica ‘Relatos sobre o derbi Celta-Dépor’ (Galinova, 2012).
