O calendario da Copa Galicia XCO chega á súa primeira paréntese despois de disputarse catro eventos en 20 días. O IV Trofeo BTT XCO Concello da Cañiza pechou un bloque inicial de carreiras que deixa a líderes moi destacados na maioría das categorías. Nesta cita, Lara Lois, do Moto Bike, sumou a súa terceira vitoria consecutiva nesta edición da competición.
Na proba da Copa Galicia XCO ata oito bikers que lucían as camisolas brancas e azuis do certame autonómico venceron no circuíto do Campo de Fútbol de Augas Férreas.
O alcalde Luís Piña encargouse de cortar a cinta e na proba organizada pola Grupeta Pan de Zarko, en colaboración coas comunidades de montes de Achas e Petán, non faltaron a súa cita coa vitoria os dominadores dos rankings elite-sub23. A xeira da elite grovense, ausente na primeira xornada, supéraa o monfortino Saúl López.
Entre os 170 bikers que rodaron na Copa Galicia de Cross Country Olímpico por un trazado con moito desnivel houbo outros cinco líderes que sumaron os 150 puntos asignados aos gañadores: Aroa Otero (Supermercados Froiz) e Alejandro García (Carballiño) en cadetes, Uxía Soto (Supermercados Froiz) nas juniors, Silvia García (Bici Verde) nas máster-40 e Jose Manuel González (Academia Postal – Maceda) nos máster-60.
O podio júnior feminino complétase con Sarela Conde, do Maceda, en segunda posición e a súa compañeira de equipo Marta García co bronce. Nas cadetes, a prata foi para Iris Fernández, tamén do Maceda, e María Cabot levouse a medalla de bronce. Entre as máster 40, Andrea Pousada, do Poio Bike, foi segunda clasificada e Jana Buba, do Coruxo CC, terceira.
A Copa Galicia XCO tómase dúas fins de semana de respiro e regresará coa súa quinta xornada o sábado 14 de maio na localidade lucense de Outeiro de Rei.