A terceira xornada da Copa Galicia de Cross Country Olímpico (XCO) ofreceu este sábado un percorrido moi técnico, tres cambios de líderes e dúas vitorias incontestables nas carreiras Elite-Sub23. Tal e como aconteceu o ano pasado na proba organizada polo Caimanes Betanzos, Lara Lois e Saúl López pedalearon coa voracidade do réptil que dá nome ao club anfitrión. A grovense do RG Bikes e o monfortino do Academia Postal-Maceda atópanse no seu hábitat cando compiten na Cortella, no Concello de Coirós.
O sensacional traballo realizado polo Caimanes Betanzos no seu circuíto permite aos bikers desfrutar dun trazado tan fermoso como esixente no manexo da bicicleta, con treitos difíciles de xestionar, entre eles un rock garden.
Despois do seu triunfal debut na Copa XCO 2023 o domingo anterior no Porriño, o guion repetiuse e Saúl López venceu en solitario. O gañador do certame autonómico o ano pasado impúxose cun rexistro de 1:25:55 e case 4 minutos de vantaxe.
O que variou respecto á xornada anterior foi a resolución da pugna polo segundo posto. Manuel Ángel Parada (Xesteiras), indo de menos a máis, superou desta vez ao líder Jorge Punzón (Cosmos) e bateuno por 2′. O porriñés, segundo no seu concello e primeiro na xornada inaugural en Ferrol, mantense á fronte da xeral elite. O top-5 en Coirós completárono Anxo Carril (Coruxo), cuarto na clasificación absoluta e mellor sub23, e Luís Fernández Oliveira (Avanza).
En canto aos cadetes e aos juniors, dous bikers que viñan de ocupar o segundo chanzo do podio no Porriño subiron un paso máis no caixón.
Logo dos problemas mecánicos da última carreira, Alejandro García dominou nos junior por diante de Martín Sestelo (Avanza), a quen desbancou do liderado xuvenil, e nos cadetes Marcos Rodríguez (Carballiño) dobregou nesta ocasión ao líder Nestor Frías (Academia Postal-Maceda). Os triunfos masters corresponderon a José Ramón Villanueva (Código Bike) nos 30, a Fernando Díaz (Narón) nos 40, a Antonio Rodríguez (Ourense Termal) nos 50 e a José Manuel González (Academia Postal-Maceda) nos 60.
Dominio de Lara Lois
A quenda feminina rexistrou a estrea nesta edición da Copa Galicia XCO da vixente campioa autonómica elite. Lara Lois desprazouse ata o circuíto da Cortella para reinar coa mesma autoridade que no 2022 e, de paso, vestirse de líder.
A biker do Grove Lara Lois pedaleou durante 1:11:27 e por detrás dela, a 8′, dúas sub23 intercambiaron os postos da anterior xornada. Carla Fernández (QueBici-Marcisport) non deu opcións en Coirós a Sofía Álvarez, que cedeu máis de 5′ sobre a gañadora do seu grupo de idade, pero conservou a camisola azul e branca do certame coordinado pola Federación Ciclismo Galego.
O terceiro ranking que cambiou de líder, o júnior feminino, encabézao agora Candela Rodríguez. A do Coruxo, segunda na carreira que se anotou Yaiza Vila (Outeiro de Rei), aproveitou a ausencia de Marta Estévez (XSM).
Nos outros tres grupos de idade de mulleres reforzaron con vitorias as súas posicións de privilexio no máis alto das xerais das súas categorías a cadete Iris Fernández (Academia Postal-Maceda), a máster-30 Raquel Vázquez (Esmelle) e a máster-40 Silvia García (Bici Verde).
Próxima parada da Copa Galicia XCO, O Carballiño
A Copa Galicia non ofrece tregua e o vindeiro domingo celebrará o seu cuarto evento no Carballiño, onde o día anterior terá lugar o Campionato de Galicia de Cross Country Eliminator.
Á provincia de Ourense chegarán como líderes do certame de XCO Iris Fernández e Néstor Frías en cadetes, Candela Rodríguez e Alejandro García en juniors, Sofía Álvarez e Anxo Carril en sub23, Lara Lois e Jorge Punzón en elite, Raquel Vázquez e Antonio Mato (Toxo) en máster-30, Silvia García e Juan José Chapela (Morrazo) en máster-40, Antonio Rodríguez nos máster-50 e José Manuel González nos máster-60.
