Máis de medio milleiro de bikers estrearon este domingo no Porriño un novo circuíto XCO, onde Lara Lois proclamouse campioa da proba.
A Asociación Deportiva Avanza organizou unha proba do calendario Mini BTT e a terceira cita da Copa Galicia XCO nos montes da Comunidade de San Salvador de Budiño. Unha festa de inauguración para todas as idades e que contou coa propia Lara Lois (Moto Bike) como madriña e Saúl López (Academia Postal-Maceda) como padriño, ambos vixentes campións autonómicos Elite de Cross Country Olímpico.
A grovense e o monfortino venceron con total autoridade nun técnico e divertido trazado, onde a calor aumentou o grao de esixencia. A xornada dividiuse en dúas sesións: ata o mediodía foi a quenda do Mini BTT, con máis de 350 participantes, e pola tarde preto de 200 amantes da competición celebraron o Domingo de Pascua buscando puntos para as clasificacións da Copa Galicia XCO.
Dominio feminino
As gañadoras femininas dominaron con claridade as súas probas no II Trofeo XCO Concello do Porriño e entre todos os triunfos desta destacou o da cadete Lorena Patiño. A corredora do Compostelano ‘voou’ nas tres voltas que deu en Budiño, impedindo que se lle achegara Aroa Otero (Supermercados Froiz), primeira na xeral tanto do certame autonómico como do estatal.
As líderes que si subiron ao máis alto do podio foron a júnior Uxía Soto (Supermercados Froiz), a máster-40 Silvia García (Bici Verde) e as dúas portadoras dos maillots da Copa na carreira Elite-Sub23.
Lara Lois abriu oco dende o inicio da proba XCO e pedaleando practicamente de principio a fin en solitario inverteu 1:05:06 en completar cinco voltas.
A líder elite repetiu a vitoria da fin de semana anterior en Coirós. O segundo posto absoluto obtívoo Andrea García (Academia Postal-Maceda), primeira na xeral sub23, terceira finalizou Irene Trabazo (XSM) e cuarta, aduxicándose o terceiro chanzo do caixón na súa categoría, a elite Desiree Fernández (Ribadumia).
Cambios nos ránkings masculinos
A primeira quenda do XCO Concello do Porriño provocou cambios no máis alto de dous rankings. Iván Pereira (Xesteiras) impúxose nos máster-40 e desbancou a Marcos Mayo (BTT O Treito), ausente nesta proba, mentres que nos máster-50 o terceiro posto de Jose Carlos Maceira, nunha carreira que se adxudicou Óscar González (Máis Que Bicis), permitiu ao porriñés do Macebiketeam adiantar a Manuel Castro (Toxo), que non estivo en Budiño. O cadro de triunfadores nesta manga completárono o líder máster-60 Jose Manuel González (Academia Postal-Maceda) e o cadete Tomás Pombo (Cambre-Caeiro) batendo a Alejandro García (Carballiño), que continúa á fronte da xeral.
Na segunda e definitiva entrega da sesión vespertina, unha rotura da cadea impediu ao líder sub23 Anxo Carril (Coruxo) arrancar xunto aos bikers da súa categoría, e o biker do Coruxo asinou unha sensacional remonta que á conclusión das oito voltas outorgoulle a vitoria no seu grupo de idade e o cuarto posto absoluto.
Ao mesmo tempo, Saúl López exhibía a súa condición de líder invicto na XCO. O monfortino marcou un ritmo que na primeira volta só o resistiu Samuel González (Máis Que Bicis) e que no segundo xiro ao circuíto deixouno en solitario. O Academia Postal-Maceda monopolizara os dous primeiros postos nas dúas anteriores xornadas da Copa, pero nesta ocasión o infortunio impediullo.
Segundo informa a Federación Galega de Ciclismo, no resto de categorías masculinas fixéronse coa vitoria o líder júnior Martín Sestelo (Avanza) e o máster-30 Fernando Guerra (Extol) tras un vibrante man a man con Jose Carlos Sanmiguel. O do Ourense Termal continúa coa camisola da Copa.
Consulta aquí as clasificacións completas.
A entrega de premios do II Trofeo XCO Concello do Porriño contou coa presenza de Alejandro Lorenzo, alcalde do Porriño; Abe Estévez, concelleiro de Deportes; José Carlos González, concelleiro da parroquia de Budiño; representantes da Comunidade de Montes de San Salvador de Budiño; membros da xunta directiva do Avanza; e Óscar Sánchez, directivo da Federación Ciclismo Galego. A Copa XCO alcanzará a súa cuarta xornada este sábado na Cañiza.
