O Cross Country Olímpico volveu ao seu circuíto emblema, o do Monte da Rega, na segunda xornada da Copa Galicia XCO. A ciclista Lara Lois proclamouse campioa en elite no campionato do XX Gran Premio XCO Concello de Cambre, organizado polo Club Ciclista Cambre.
No circuíto citáronse máis de 200 bikers e entre eles destacou a grovense Lara Lois, do Extol, liderando os ránkings do certame autonómico obtendo o seu triunfo absoluto.
A ciclista xa obtivera grandes resultados na xornada de apertura da Copa na Cañiza a mediados de abril e desta vez repetiu cunha espectacular actuación. Lois rodou case en solitario desde o inicio, finalizando cun rexistro de 1:26:31.
O segundo posto en Cambre foi para Diana Blanco, do Bicicletas Chinquena, mentres que o bronce quedou para Desiree Fernández, do RSBike. Do mesmo xesito, Laura Mira, do Avanza-O Porriño, repetiu éxito en Cambre con corenta segundos de vantaxe sobre a local Sofía Álvarez.
As outras vencedoras do XX Gran Premio XCO de Cambre
Na categoría cadete, o ouro foi para María Filgueiras, do Caimanes Betanzos, debutante na Copa. A segunda clasificada foi Marta Estévez, do Avanza-O Porriño, asaltando a primeira posición da xeral.
No máster 30 tamén houbo estreas, como a de Eva Ortega, do Biciosos-Rías Baixas, quen volveu co ouro a casa. A líder, Silvia García, do Bici Verde, rematou na segunda posición.
As probas masculinas estiveron moi rifadas ao longo da xornada. Na primeira quenda, ningún dos tres corredores que chegaban como líderes conservaron o seu status. En cadete, o vencedor foi Martín Sestelo, no máster 50/60 triunfaron José Ramón Castelo e Manuel Castro. Mentres, nos máster -40 o primeiro clasificado foi Alejandro Trasbasch.
Na raíña masculina, Saúl López venceu sen apuros. O ciclista do Academia Postal-Abanca de Maceda completou o circuíto nun tempo dunha hora, 24 minutos e 46 segundos. No sub23, o ouro foi para Andrés Valcárcel.
