A ciclista galega Lara Lois acada unha medalla de bronce en Valladolid dentro do Campionato de España de XCO. En total a representación galega conseguía cinco metais de bronce. A representación feminina da Selección Galega estivo formada por a citada Lara Lois e as sub23 Irene Trabazo e Andrea García, según informa a Federación Galega de Ciclismo.
A competición tivo lugar durante a fin de semana en Valladolid. A grovense Lara Lois (Selección de Galicia) e o macedao Pablo Rodríguez (BH Templo) finalizaron terceiros nas carreiras da categoría Elite. Os seus podios sumáronse aos acadados polo sub23 Iván Feijoo e o máster-30A Manuel Ángel Parada.
Especialista en probas de BTT Maratón, Lara Lois espremeu a súa condición de fondista para colgarse o seu primeiro metal a nivel estatal nun campionato de Cross Country Olímpico. Lucindo as cores do combinado autonómico, a biker do Extol MTB soubo administrar as súas forzas no enlamado e esvaradizo circuíto do Cerro de las Contiendas. Comezou a última volta fóra do postos do caixón e acabou cruzando a liña de meta co mesmo tempo que a subcampioa.
Así foi carreira de Lara Lois
A do Grove realizou unha boa saída e o primeiro dos cinco xiros ao trazado de 5,2 quilómetros de lonxitude completouno xunto a Claudia Galicia (Megamo). Por diante delas rodaba destacada en solitario Rocío García (BH Templo). Lara Lois non puido manter o ritmo da súa acompañante na segunda volta e mantívose terceira ata que no penúltimo parcial foi atrapada por Noemí Moreno (Costa Daurada) e María Díaz (Armilla).
A progresión de Díaz continuou. Iniciou a última volta ao carón de Galicia, que sufrira unha avaría, e con 15 segundos de vantaxe sobre Lara Lois. Porén, a pontevedresa non dixera a súa última palabra e no derradeiro parcial foi a única corredora que baixou dos 20 minutos, o que lle permitiu xogarse a prata ao esprint despois de que se descolgara Díaz. Entrando a 2:14 da gañadora García, a catalana Galicia impúxose no duelo pola segunda posición.
Nesta carreira feminina a ‘medalla de chocolate’ entre as sub23, que deron unha volta menos que as elites, correspondeu a Irene Trabazo. A marinense da Selección de Galicia terminou cuarta, a 2’ da terceira clasificada Estíbaliz Sagardoy (Navarra), mentres que a súa compañeira no combinado galego Andrea García ocupou a duodécima praza.
Regreso ao podio de Pablo Rodríguez no Campionato de España
Dous anos despois o ourensán Pablo Rodríguez volveu pisar o caixón elite no Campionato de España. O corredor de Maceda protagonizou un duelo a tres bandas na proba raíña masculina con David Valero (MMR) e Sergio Mantecón (Kross Racing). Unha batalla sobre o barro na que o galego do BH Templo tivo que conformarse co bronce.
Mantecón comezou mandando, pero Valero e Rodríguez tomaron o mando no segundo dos sete xiros ao Cerro de las Contiendas. As dúas últimas voltas resultaron do máis emocionante. O do Kross Racing chegou a alcanzar ao dúo de cabeza xusto antes de que o defensor do título cambiara o ritmo e abrira oco en solitario.
Ao toque de campá, Rodríguez ía segundo, pero Mantecón acabaría adiantándoo dentro dos últimos 5 quilómetros.
O campionato resolveuse con Valero logrando o seu quinto ouro con 19” de marxe e avantaxando en pouco máis de 1’ ao macedao. Cuarto concluíu Ismael Esteban (Logos), quinto Kevin Suárez (Nesta) e sexto o medallista olímpico Carlos Coloma (BH Templo).
En canto aos corredores da Selección de Galicia, o vixente campión autonómico Saúl López asinou a duodécima posición, Jorge Punzón a 44ª e Alberto Pedreira a 56ª.
Tres bronces galegos na primeira xornada
Na xornada sábado Iván Feijoo (Selección de Galicia) colgouse a medalla de bronce na proba sub23, o mesmo resultado que Manuel Ángel Parada (Rsbike Boiro) obtivo na categoría máster-30A. Outra destacada actuación asinouna Miguel Rodríguez, quinto na carreira júnior lucindo as cores do combinado autonómico.
O alaricano Feijoo aínda non contaba no seu espectacular palmarés cun metal sub23 a nivel estatal na modalidade de Cross Country Olímpico. Actual campión de España de ciclocrós, o ourensán atopouse no circuíto pucelano do Cerro de las Contiendas un escenario ao que está moi acostumado: un terreo enlamado polas chuvias caídas na noite anterior e na primeira metade da carreira.
Dende a primeira das seis voltas ao trazado vallisoletano de 5,2 quilómetros de lonxitude, cumpriuse o guión previsto. O gran favorito Jofre Cullell (Megamo) marchouse en solitario e Feijoo situouse segundo, máis pendente dos seus perseguidores que do primeiro clasificado. O representante da Selección de Galicia chegou a contar con máis dun minuto de vantaxe sobre un terceto no que David Campos (Murcia) soltou de roda aos seus acompañantes no cuarto xiro.
“Sabía que viña a loitar polo segundo posto. A metade de carreira ía bastante ben, con distancia sobre o terceiro, pero na quinta volta tiven varios problemas mecánicos seguidos”, sinala Feijoo, penalizado polas avarías. Campos aproveitou os contratempos do galego para adiantalo e acabar baténdoo por 43 segundos. O de Allariz, que entrou a case 5 minutos de Cullell, non deixou escapar o bronce e na meta avantaxou en 38” a Julen Latorre (Kross Team).
Con esta medalla Feijoo quítase a espiña das súas dúas anteriores participacións como sub23 no Campionato de España de XCO. “Téñoo preparado bastante mellor, pero respondín bastante ben fisicamente e estou contento”, afirma o ciclista de 21 anos, que segue unha planificación enfocada cara a temporada de ciclocrós.
A continuación da carreira sub23 disputouse a júnior, con Miguel Rodríguez acadando o quinto posto. O ponteareán quedou a 1:20 da terceira praza e no top-10 tamén finalizou Marco Nube Lema (Academia Postal-Maceda), décimo na táboa. Pola súa banda, Anxo Carril e Gabriel Conde, ambos co maillot da Selección de Galicia, terminaron 34º e 39º respectivamente.
A colleita de metais para a delegación galega arrancou con Manuel Ángel Parada na categoría máster-30A. O do Rsbike Boiro conquistou o bronce ao esprint, impoñéndose na recta final a Álvaro Martín (Bikes Armilla). O compañeiro de equipo do galego, Iván Pereira, rubricou a sétima posición nos máster-30B, mentres que Miguel Ángel Arias (Extol MTB) rematou oitavo nos Máster-40B e Manuel Bugallo (Biciosos-Rías Baixas), a cuarta nos máster-50B.
